الام والاب بيتحولوا مع الوقت لتمثيلات نفسية..صور داخلية...وبتتحول العلاقة معاهم من الخارج للداخل. بين صورة الطفل وصورة الراشد.
تمثيلات نفسية فيها افكار وانفعالات وسلوكيات وانماط.
فجأة هتلاقي صوت او صورة او ذكرى جواك بينتقدك ويجلدك (الام او الاب)...وهتلاقي مشاعر الم وخزي وخوف (الطفل)...
او هتلاقي صوت او صورة او ذكرى بيطمنك...وشعور بالارتياح والهدوء والسكينة
صورة ماما العصبية وبابا اللامبالي...او صورة ماما اللي بتحضنا وبابا الفخور بنا. ..ومشاعر الخوف او مشاعر الحرمان...مشاعر الطمأنينة او مشاعر الثقة والفخر بتملانا.
وهكذا
مراية ماما او بابا اللي برة..وانعكاس صورتنا فيهم بيحولوا لمرايات جوانا وبنشوف نفسنا من جوة فيهم برضو...ونفس العلاقة بتظهر تاني...افعالنا اللي كنا بنعملها واحنا صغيرين عشان يشوفونا ويقبلونا ويحلونا ويعجبوا بينا هي هي بنعملها قدام عيونهم الداخلية اللي بتراقبنا.
بننجح مثلا عشان نشوف نظرة الفخر والاعجاب في عيونهم...او بنقرب عشان نسمع التطمين منهم....وهكذا
نفس العلاقة بتتكرر جوانا كل يوم...وبنسقطها على الخارج من تاني..على الناس...
لما المرايات يكونوا حلوين وبيحبونا...بنشوف نفسنا مع الناس حلوين ونتحب...ولما تكون المرايات بخيلة او معاقبة او مخيفة او بيضغطوا علينا.او متلاعبة.بنشوف الناس والدنيا بخلاء او معاقبين او مخيفين او عبء علينا او مستغلين.
اللي بتقدمه الام في البوست اللي فات هو ما يعرف بالأمومة...
لما يتقال امومة او ابوة الذات..هو اللي بتقدمه الام والاب لينا واحنا اطفال..واللي نقدر نغرسه جوانا من تاني عشان نظبط العلاقة جوانا..وعشان تظبط تعاملاتنا مع انعكاساتهم في الدنيا والناس.
هم بيقدموا ايه...
بيقدموا الانعكاس لصورتنا....قدرتنا على اننا نشوف نفسنا ونلاحظها
الاهتمام بالذات..والعناية بها ورعايتها
الحب غير المشروط
القبول غير المشروط
التعاطف مع الذات
التسامح والغفران
الاحتواء والتطمين
الاعجاب والتوكيدات والكلام الايجابي
التقدير
التوجيه والتعليم
الانضباط والتهذيب
الحماية من الاخرين وحمايتنا من نفسنا
التأكيد على مشاعرنا واحتياجاتنا وافكارنا وصفاتنا..الvalidation واحترامهم.
مساعدتنا نعرف مشاعرنا ونفسنا واحتياجاتنا ونعبر عنهم..نعرف من نحن..ونكون حقيقيين.
التعامل مع الاخرين
احترام الذات والاخرين
الاعتذار
الخ
امومة وابوة الذات هو اننا نقدر نعمل ده لنفسنا...اصلاح المرايات جوانا..واصلاح العلاقة بين الطفل والوالد...وده هينعكس على علاقاتنا بالخارج وعلى تربيتنا لاولادنا.
ايوة في ناس كانت محظوظة انها متحتجش كل المجهود ده ...وناس تانية اقل حظا بيدفعوا ضريبة الاساءة والحرمان اللي مكنوش مسئولين عنه..وفجاة اصبحوا مسئولين يصلحوا اثار ده جواهم والمريات المكسورة عشان يشوفوا نفسهم من جديد. مجهود كبير والم كبير بس ممكن فعله..لو عايزين وقدرنا نتعهد لنفسنا اننا نشيل الانقاض ونبني نفسنا من جديد...بس المرادي بايدينا احنا وعلى مزاجنا احنا.
عايزة صبر عشان نلغي تأثير ملايين التفاعلات اليومية اللي حصلت خلال سنين واحنا كنا لسه صلصال بيتشكل بسهولة...عشان كدة الصبر والتصبر والتذكير اننا مش هنعيش في بيوت متهدمة جوانا مليانة مريات مشوهة ومش هنورث ولادنا بيوت عنكبوت.