يسعد صباحكم جميعا أخواتي وأخواني الكرام
رب العالمين يحفظكم ويحفظ اهاليكم وشعوبكم وبلدانكم
ويبعد عنكم شر البشر والقدر والأمراض والاحزان
اليوم مرت الذكرى الاليمة الـــ 34 على مجزرة مدينتنا الجميله (حلبجة الشهيدة) يلي انضربت بالقنابل
الكيمياوية (متل مدينة هيروشيما اليابانية) من قبل نظام حزب البعث المقبور والطاغية صدام حسين
كل سنة كننا نسافر للمدينة ونزور مزار وقبور الشهداء وننعم بشوي سكينة
بس للأسف هيدي السنة ماقدرنا نسافر لهيك واسيت حالي بمدونتي
بعتذر من كل زوار مدونتي الغاليين ,, المدونة مليانة حزن وأسى (عكس طبيعتي المعهوده)
لآنو عنجد هيدا هو واقع الحال بهاليوم الفاجع !!
في السنوات السابقة كنا نلبس الزي الكوردي الأسود وناخد ورود حمراء وبيضاء لقبور الشهداء
ولنصب الشهيد (عمر خاور) وابنه الرضيع يلي صارو رمز للمدينة الجريحة
ونسجل خواطرنا ونترجم مشاعرنا في سجل الذكريات الموجودة في مزار الشهداء
المليانة بالكتابات بكافة اللهجات وبلسان الزائرين يلي من بلدان مختلفة
طبعا قبل ماتفوت لقبور الشهداء مكتوب هالعبارة (ممنوع دخول البعثيين)
ومش بس قبل المقبرة موجودة هالعبارة في مدخل المدينة الشهيدة
وكتر خير الله انو ربنا انتقم من الطاغيتين يلي أمرو ونفذو مجزرة المدينة ونالو عقابهم المستحق
(بعد اعدام علي كيمياوي ارسلو الحبل الذي شنق بيه كــ ذكرى لمزار الشهداء)
وكـــ دلالة ويقين انو رب العالمين مرح يخلي حق الظالم ع المظلوم ورح ينتقم منو ولو بعد حين
الف حمد والف شكر لالك ياربي هلآ أرواح شهدائنا الابرار رح ينعمو ويرقدو بسلام
الف رحمه ونور على أرواح شهداء حلبجة وكل شهداء كورد وكوردستان
العار والخذلان لكل الطواغيت والمجرمين واعداء الشعوب المسلمة والمسالمة