يشغلني الهاجس .. وإذا زاد التعب بي إسترحت
ودي لذيذ النوم لا حس بغرابيلي .. يـرق !

أنا حزين ؟ .. أو إني أتضايق إلا مني سرحــت ..
آصك بابي .. وأشغل البال بـ سواليف الورق ..

كنت أكتب شكثر البكى هاين علي من يوم رحت !
و من التعب .. نامت أحاسيس وصحاها الأرق

جالس أعد بآخر الأيام .. كم مره إنجرحت !!
وإذا عرفت أسأل ثمين الوقت .. كم منه إنسرق !

وأضحك أبي كل البشر تدري .. وإذا صديت صحت
ما ودي العذال تشمت بي وأنا ميت غرق !

وأنا وقفت لضيقة الفرقا .. وضاقت بي وطحت ..
إلين قلت بصوتك المبحوح " مابي نفترق " !

حبيبي إن كان الفرح صادق .. فأنا والله فرحت ..
كنك رجعت تعلم الأيام .. ويــش اللي فرق ..

أمس أكتب أحزاني من الحسرة ولا مره مسحت ..
واليوم أشب بدفتر الذكرى .. وأشوفه يحترق

الليلة البدر يحكي لك .. كيف بـ الهم إنذبحت !
كني سجين ٍ .. كل ما يحكي عن عياله .. شرق !

الليله تعرف شكثر تطري علي من يوم رحت !
وتشوف كيف إنه شغل بالي سواليف الورق ..