طبعا لا أنكر وجود السحر والعين والحسد ... وإن في ناس مؤذية فعلا بتستخدم الحاجات دي لأذى الناس ... او حتى ده ممكن يحصل بشكل غير مقصود ... وإن في بيوت إتدمرت بسبب الموضوع ده
لكن الحقيقة إن في بيوت كتيرة الناس فيها مركزة في موضوع الحسد والاعمال والأحلام بشكل مبالغ فيه جدا ... و بيكونوا شايفين إن الحاجات دي هي السبب الرئيسي لمشاكل كتير في حياتهم .... وده طبعا بيخليهم مايدوروش على السبب الحقيقي ... وبيحسوا طول الوقت إنهم مُستهدفين وان في ناس حواليهم بيأذوهم بقصد او بدون قصد .
وطبعا في منهم بيكونوا فريسة للدجالين ... وأحيانا بيلجأوا لبعض الأفعال التي لا تخلو من الشرك
نعم ... قد تصاب بعض البيوت بالأذى بسبب الكلام ده ... لكن الحقيقة إن معظم الناس اللي بيفكروا بالشكل ده بيكونوا موهومين و مبالغين ... وده بيأزم مشاكلهم مش بيحلها
المشكلة الأخرى ... ان الناس اللي حواليهم بيعانوا من التعامل معاهم .... فكرة انك تتعامل مع حد بيبالغ في الخوف من الحسد.... بيخليك تبقى مش عارف تتعامل معاه بأريحية ... لأنك عارف انك لو مدحت في شئ عنده او حتى جبت سيرته وفضلت تقول (اللهم بارك ... وما شاء الله) وحصلت مشكلة بعدها هايتهموك انك حسدتهم .
ولو تجاهلت اي حاجة حلوة بتحصل عندهم عشان ماتتحطش في دايرة الاتهام ... ممكن يفسروا سكوتك بإنه حسد داخلي صامت برضه 😄 ... وحاجة مربكة جدا الحقيقة
إستعينوا بكل ما هو شرعي في حماية أنفسكم واولادكم من الحسد والعين (زي الأذكار والقرآن..الخ) ... ولا تبالغوا في الأمر بالشكل اللي يفسد عليكم حياتكم ويفسد علاقتكم بالناس اللي حواليكم