في الغالب الاطفال في موسم المدارس بيناموا بدري لأنهم بيصحوا بدري.... لكن في الاجازة بيتعودوا يسهروا ويناموا في نفس مواعيد نوم الاب والام .. لكن ده مش صح وعيوبه كتير ... ليه؟
- طبعا السهر غلط على الأطفال... على المستوى الجسدي والنفسي
- مهم يكون للزوج والزوجة وقت خاص بيهم... من غير الاولاد
وقت يريحوا فيه شوية من اللف في دايرة المسؤوليات في الشغل والبيت ومع الاولاد ... وقت يقعدوا فيه سوا يتكلموا او يقضوا مع بعض لطيف كزوجين
او اللي عاوز يقرأ حاجة او يتفرج على حاجة.. او يقرأ شوية قرآن او يصلي ركعتين ...او حتى يبص في السقف 🙂
وجود الاولاد طول اليوم معانا واللي طلباتهم وشقاوتهم ما بتخلصش .... ده بيخلينا مستهلكين ومستنزفين طول الوقت
انا بشكل شخصي... لو الولاد هايفضلوا صاحيين معايا لحد ما ننام .... هاجي آخر اليوم أحدفهم بالطوب من تعب الأعصاب 😄 ... لكن من الحاجات اللي بتخليني أستحملهم شوية وأستحمل ضريبة شقاوتهم و التواصل معاهم في الشوية اللي قاعدين فيهم سوا مع بعض ... أني عارف إنهم هايناموا في ميعاد نومهم وإني هآخد شهيق بعد ما يناموا
في بيوت .... الزوجين عندهم مشاكل كتير كانت نتيجة للتفصيلة دي واللي تبدو إنها حاجة صغيرة .. لكن الحقيقة ده موضوع مهم جدا
فمن باب التفاعل
لو حد مقتنع بالكلام اللي فوق ده ... بس مش عارف ينفذه ... إيه المعوقات اللي بتقابلكم؟
والناس اللي نجحوا يعملوا كده ... عملتوا كده إزاي؟ .. وتنصحوا الناس بإيه؟