ومساء الخير .. والمسك والبلور .. مساء الاحساس واللولو المنثور ..
كيفكم ؟!
اليوم الخميس ،، اعترف اني ضغطت نفسي بالتزامات طول الاسابيع الماضية
كنت اتوقع اني ما حقدر أنجز ولا واحد منها لكن ..
الالتزام الأول / حفل تخرج بنتي ، وفرحتي الأولى من الصف السادس
اقترحت على مدرستهم اني امسك فيديو التخرج حقهم .. طبعاً مو لله بس عشان اطلع صور بنتي فيه اكثر شيء
واشتغلت عليه اسبوع كااامل والحمدلله طلع بصورة جميلة بعد تجارب عديدة بعدة برامج وما كنت ابغاه فيديو عادي .. لازم يكون مليان حركات وانيق ومرتب
الالتزام الثاني مع دبلوم الماكس دخلنا في اختبارات وواجبات صعبة صراحة وحسيت اني بالبداية ضايعة بالبرنامج وبعض الأوامر ما كنت اعرف مكانها .. وبعد محاولة دامت ٣ اسابيع قدرت ذا الاسبوع انجز تصميم ٥ طاولات وكرسي الحمدلله
النتيجة ١٠٠٪ مطابقة لصورة مطلوب ننفذها
الالتزامات الباقية عائلية .. توفت جدتي رحمها الله قبل اسبوعين .. وانشغلنا جداً
..
طايحة ذي الفترة بتجارب المشروبات الحارة < اش جوك مع الصيف
المهم اني أفتح البنتريست واي صورة مشروب تعجبني احطه ببالي وابحث عن الطريقة اللي ممكن اسويه فيها
وبعدها أستمتع بالنتيجة
وبس والله .. اجبرت اهلي يتخلصوا من بسسهم ههههههههه
كل مارحت لهم اتضايق من حوستها وتجيني حساسية منهم بس اعطس وخشمي يقلب طماطم
لما الحمدلله تخلصوا منها تماماً عند محل يتصرف فيها
الثنائي المفاعيص اللي عندي كبروا ودخلوا مرحلة الاتفاق على عمل جريمة يومية بالبيت
وصرت بس ألاحقهم كل ما اختفوا وسكتوا اعرف ان عندهم مصيبة هههههههههههههههه
وسلامة قلبكم حبايبي