صديقي اذرف دموعك هالبكى فطرَه
الدمع ما قَلّل و مازاد مقدارك
خَل امس و افرد يدين احلامك لـ بُكرَه
كمّل بدون اللي يغيبون مشوارك
اللي رَحل معه عُمره ما معه عذرَه
لوّ انّه يحب ما سافَر عن ديارك
لا تنتظر مايجيك ايّ شخص تنتظره
انساه بُكره يجي و يدوّر اخبارك
و اللي انكسَر هالزمن يتكفّل بجَبره
مصير فصل الربيع يعانق أشجارَك
و من راس فَرحك اذا هَز الحزن شَعره
الشوك مخلوق من ربّي مع ازهارك
الصبح مايدري لهالحين كَم عُمره
لاتحسب سنينك ولا تَحسب امتارك
و العمر ماهو بطوله لا ولا قصره
بأحداثه اللي بها جنّتك أو نارك
لاتختبر صاحبك دنياك تختَبره
تصغّر كبارك او تكبّر صغارك ..