07-14-22, 07:11 AM
|
#40 |
| | | | | | | | | | | | | | | | | | الهوايه » القراءة بشكل عام وكتابة بعض الخواطر | | | | | | | | 
طريق_السعداء
الدرس_رقم_ 36
تابع ...... اعفو_عمن_ظلمك
اهلا وسهلا احبابنا الكرام
فكرتم في كلامي امبارح عن التسامح وانك تعيش بالمبدأ ديه في حياتك
وانه يبقى اسلوب حياة متشيلش في قلبك ابدا من حد
أنتم عارفين ايه الفرق بين اللي بيعفو ومابيعفوش إيه؟ ⁉️
في نفوس كبيرة تعفو وتسامح....... وفي نفوس صغيرة شايلة الغل والثأر مش قادرة تنسى.......
مش قادر يسامح فات عشرين سنة...... إتخانق مع أخوه على ميراث أبوهم اللي سابهم إخوة ومات الراجل
اتخانقو ودخلوا في محاكم وقضايا وفات عشرين سنة ولغاية انهاردة مانع ولاده يزورو ولاد أخوه مانعهم من صلة الرحم علشان ثأر عشرين سنة!
إيه النفس الصغيرة دي.
انت الوقتي نفسك كبيرة ولا نفسك صغيرة.. ‼️
عايز تعرف الفرق بين النفس الكبيرة والنفوس الصغيرة..
النفوس اللي شايلة حمل الثأر والغل من عشرين وتلاتين سنة؟‼️
كانك شايل حقيبة ذكريات مؤلمة. على ظهرك .... حقيبة.. شنطة مليانة ثأر وغل.. تخيل تقيلة أد إيه؟ ‼️تخيل انت ماشي شايلها طول عمرك!... والله تقيلة.. ...تخيل!
شايلها على كتفك ومتقلاك. عرفت إيه علاقة الموضوع ده بالسعادة؟ ⁉️
انت شايل حمل تقيل.. انت مش عارف تمشي..... افتح الحقيبة وارمي اللي فيها.. ...اعفو...... سامح عشان تستريح.. والله حتستريح.. وهاتعيش سعيد......
تيجي نخلص من الشنطة التقيلة ديه من على ظهرك .. تعفو دلوقتي.. ...تيجي ننوي..
بالله عليك اعفي عن جارتك دلوقتي..... اعفي عن اللي ظلمتك واتكلمت عليكي..... ياللا نرمي الحجر ونحمل حقيبة نقية.. ....ياللا بسم الله.. ....معلش بيوجع شوية.. ...بس تخيل الحقيبة بقت عاملة إزاي..
.... بئت خفيفة.. .....
.. مين عفا؟‼️ مين عفا عن حد؟ ‼️مين سامح؟‼️
يوم عفوك يوم شفاءك.. .. شفاءك من أمراض القلوب....
خلي بالك انت أحيانا مابتعفوش عن الناس مش عشان همه وحشين قوي لكن عشان في غل أو حقد أو حسد.. .....يعني في مرض من أمراض القلوب عندك؟‼️
.. اعفو.. اعفو عشان قلبك يشفى..... اعفو عشان تكون من اهل الجنة ...
... اعفو علشان قرارك بعدم العفو قرار باستمرار المعاناة وشيل حقيبة الذكريات التقيلة..
السيدة عائشة بتسأل النبي أقول إيه ليلة القدر: (يا رسول الله أرأيت إن وافقت ليلة القدر ما أدعو قال تقولين اللهم إنك عفو تحب العفو فاعف عني) الألباني. عشان ربنا يعفو عنك اعفو عن الناس،
اعفو عن الناس وقوله يا عفو أنا العبد الفقير عفيت عن أخويه.. عفيت عن جاري.. عفيت عن عمي.. عفيت عن صديقتي ... عفيت عن شريكي..
اعفو عني يا رب.
تخيل انك تروح لمالك الملك رب العالمين وانت بتقوله أنا الفقير عفيت عمن ظلمني اعفو عني يارب
شفت الثواب أد إيه؟⁉️
شفت حتاخد إيه؟⁉️
تاخد جنة وتاخد عفو ربنا، عارف عفو ربنا يعني إيه؟ ‼️
يمسح كل اللي فات...... العفو يعني إزالة الآثار، .....
عفت الريح الآثار يعني أزالتها، تعرف تعفو كده؟‼️
إيه رأيك تجيب ورقة وقلم دلوقتي وتكتب أسامي أكتر خمسة ظلموك ومضايقينك في حياتك في الماضي..
... تعفو.. تسامح.. إيه رأيك؟.
خد بالك : الشيطان بيقولك إيه عشان ماتسامحش..
لأنه العفو خلق يرضى عنه الله..... يحبه الله [... وَالكَاظِمِينَ الغَيْظَ وَالعَافِينَ عَنِ النَّاسِ وَاللهُ يُحِبُّ المُحْسِنِينَ] {آل عمران:134}..
انت حبيب الله، انت يوم ما بتاخد في قلبك قرار عفيت عن فلان.. با فلان يا ابن عمي يا اخويا
خلاص اللي فات مات أنا سامحت.. مافيش حاجة.. ....أول ما بتعمل التليفون ده.. .... ان شاء الله هاتكون انت حبيب الله
خليها لله.... .....في اللحظة اللي انت عملت التليفون ده [... وَاللهُ يُحِبُّ المُحْسِنِينَ] [... وَالكَاظِمِينَ الغَيْظَ وَالعَافِينَ عَنِ النَّاسِ وَاللهُ يُحِبُّ المُحْسِنِينَ] انت حبيب الله. إيه رأيك؟ ⁉️
تسامح ولا متسامحش؟
عارف الشيطان بيجي يقولك إيه عشان ماتعفوش لأنك حتبقى حبيب الله، ، عارف بييجي يقولك ليه.. إوعى تكون غبي.. بيقولك كدة.. انت عبيط؟!
تسامحه بعد االي عمله؟!
إوعى مايستاهلش.. دا كده حيركبك..
دا حيعملها تاني ويكررها ميت مره..
دا انت كدة حتبقى ملطشة..
حيقولك كده..
ماتصدقوش....... قلد النبي صلى الله عليه وسلم...... خليك نفس كبيرة..
ماتبقاش نفس صغيرة.. .....ارم الثأر والغل عشان تعيش سعيد العمر قصير....... العمر قصير مش مستحمل تعيش شايل أثقال ......كفاية الأثقال بتاعتك وذنوبك وأخطاءك.. ....تشيل كمان ثأر وغل! .
أديك أمثلة لناس سامحت وعفت..
شوفوا سيدنا علي بن أبي طالب.. بيحارب واحد
وسيدنا علي قوي وانتصر عليه وحط السيف على رقبته في معركة ضد الإسلام.. حرب عادلة..
وبيحط السيف حيموتو خلاص.... قام الراجل باصق على وجه سيدنا علي
فقام قايم وشايل سيفه وسايبه..
فالراجل قاله انت كنت حتموتني سبتني ليه؟
قاله انا كنت حموتك لله ولما بصقت على وشي بقيت حموتك لنفسي فعفيت.. ....
لأ نفسي لأ..
مش عايز أموتك لنفسي.
. يااه!.
شوف عفو واحد زي زين العابدين بن الحسين بن علي رضى الله عنهم اجمعين لما كان عنده جارية والجارية دين شايلة مية مغلية فالمية المغلية وقعت على ابنه..
تخيل لما تقع على ابنه..
تعمل فيها إيه الجارية دي؟ ‼️
في حديث للنبي بيقوله (جاء رجل إلى النبي صلى الله عليه وسلم فقال يا رسول الله كم أعفو عن الخادم قال كل يوم سبعين مرة) المنذري..
عشان الخدم دول أكثر ناس ممكن تشوف منهم غلطات فتؤزيهم..
فزين العابدين لقى المية المغلية وقعت على ابنه.. ابنه اتاذي او يقال مات.. فالجارية بتترعش.. حيعمل فيها.. فنظرت إليه وقالت له: [... وَالكَاظِمِينَ الغَيْظَ... َ]
قال: كظمت غيظي..
قالت: [...وَالعَافِينَ عَنِ النَّاسِ... ]
قال: عفوت عنك..
قالت: [... وَاللهُ يُحِبُّ المُحْسِنِينَ]
قال: اذهبي انت حرة. صعبة
أنا عارف إنها صعبة قوي.. صعبة قوي بس عفا.. ما خلاص ما الولد مات.
تقدر تعفو؟‼️
انت نفس كبيرة؟‼️
انت زي أبو بكر الصديق لما اتكلموا على بنته السيدة عائشة وفي وسط ما همه بيتكلمو مين اللي بيتكلم؟
ابن خالتها اللي أبو بكر بيصرف عليه فتنزل الآية [... وَلْيَعْفُوا... ] شوف ربنا بيخاطبك [... وَلْيَعْفُوا وَلْيَصْفَحُوا أَلَا تُحِبُّونَ أَنْ يَغْفِرَ اللهُ لَكُمْ... ] {النور:22}
فقال: بلى أحب أن يغفر الله لي.. وقام مرجعله العطاء ولا كإن في حاجة.
اعمل زي أبو حنيفة..
عمل إيه أبو حنيفة؟‼️
واحد شتمه بأمه فقال: الله يعلم أن أمي ليست كما تقول..
فالراجل قام رادد عليه –وقاله: يا فاسق يا زنديق..
أبوحنيفة!!! رد عليه قاله –بص الدعوة-:
اللهم إن كنت كما يقول فاغفر لي، وإن لم أكن كما يقول فاغفر له. ....
تعرف تكون النفسية دي.. اعف عمن ظلمك.
اعف زي سيدنا يوسف لما عفا.. ... اللي قالهم [... لَا تَثْرِيبَ عَلَيْكُمُ اليَوْمَ يَغْفِرُ اللهُ لَكُمْ... ] {يوسف:92} بعد ما رموه في البير واتسببوا إن هو يتغرب عن أبوه سنين طويلة.
التسامح مش مرة ولا اتنين.. التسامح طريقة حياة.. التسامح طريقة عيشة.. تعرف تعيش كدة؟ ‼️
تعرف تعيش (لا أجد في نفسي لأحد من المسلمين غشا ولا أحسد أحدا على خير أعطاه الله إياه)؟.
|
|
|
 |