من ضمن المقولات الجميلة :
( متصنع الأخلاق تفضحه الخصومة )
طيب ماعلينا من هذي المقولة .....فقط بس أعجبتني وجت على بالي يوم دخلت المدونة ...بغض النظر عن تطابقها على حالتي ...
المهم فيه بعض الأشياء أصبحت ما أقدر أستغني عنها ...وهي ( السبحة ) مدري بعضهم وش يسميها ...حنا نسميها سبحة ..
المهم السبحة ما أطلع من البيت سواءً لزيارة ولا مناسبة ولا رايح لأقاربي ولا خوياي ولا أي مكان ...لازم تكون معي ....
لدرجة ان مرة كنت راح لـ خوياي ( أصحابي ) .....المهم في الطريق اكتشفت اني ناسي السبحة ....وكأني ناسي سروالي ...
وعلى طول أقرب بقالة على طريقي... واشتري سبحة بـثلاث ريال أو أربعة ..طبعًا أنا أشتري من الرخيصة ..فأنا اللي معي الآن قيمتها بـ ( 3 ريال ) ثلاث ريال ...حباتها مش كبيرة ...وسادة ...وخفيفة .....وسهلة في اليد ...ماتضايق ....
يعني أحب تكون يدي متمكنة منها وتكون ناعمة ومش مزخرفة وماتكون حباتها عليها نقش ......وماتكون لها قذلة ...يعني الخيوط اللي في مقدمتها ماتكون مبثورة ومنفوشة...أحب الخيوط تكون على شكل قرنين أو ثلاثة ..يعني زي شعر بنات الابتدائي يوم يروحن للمدرسة شعرهم مسوياته قرنين ..
المهم ما أعرف أجلس ويدي فاضية بدون سبحة ...وإذا دخلت مجلس وأنا ناسيها ..تلقاني ألعب بالمفاتيح بـ يدي ... لأن خلاص السبحة ادمان عندي ...
أنا هالحين أكتب كلامي هذا وجنبي السبحة ....ويوم أقرأ مواضيعكم وردودكم ومدوناتكم وملفاتكم في المنتدى ..تكون السبحة في يدي أتسلى فيها وأنا أقرأ ...
خلاصة كلامي :
السبحة بالنسبة لي مثل الشنطة بالنسبة للحريم ...
فـ الحرمة تلقاها تشيل الشنطة معها كل ماطلعت من البيت ..حتى لو كانت الشنطة مافيها إلا منديل ... وخاتم داخل في زاوية الشنطة ما انتبهت له وماهي دارية عنه .... لأنه خاتم مضيعت من زمان وماتدري وين حاطته ..
وعلى فكرة داخل زوايا شناط الحريم ممكن تلقى في الزاوية حبة فصفص أو بقايا من الروج أو المكياج على شكل حبيبات صغيرة ..أو ممكن تلقى صامولة صغيرة حقت حلق الأذن طايحة وداخلة في زاوية الشنطة....أوطايح في الزاوية أظفر بلاستيك صناعي حق أصباعها الصغير وما انتبهت له ...أو ممكن تلقى بقايا مناديل على شكل قطع صغيرة جدًا ...أو ممكن إبرة ...الخ ..
.. ...
.......