في يوم ما هيتقال علي جيل 2020 و2010 جيل الطيبين برضه
الامر نسبي ... الامر لا يتعلق بما عاصره البعض من صعوبه في حياته
بل ما انتهي اليه .. وما ترك به اثر لدي صغاره وخاصة احفاده ...

يعني انا مثلا من مواليد التسعينات
و اكثر الفترات المحببة لقلبي
ما بين سن 6 الي 15 سنة ..
لاني عاصرت فيهم الاجداد والجدات
اللي هما مواليد يمكن الخمسينات
اعتقد ان وجودهم كان بيجمعنا
وطبيعي وجودهم كان نقي وطيب
لانهم كانوا في فترة في حياتهم
مش عاوزين حاجة من الدنيا
غير اللمة وانهم يطمنوا علي اولادهم واحفادهم ..
وبالتالي انت بتشعر بالسعادة حواليهم وبوجودهم
هما جيل الطيبين ... لان احنا كنا لسا طيبين
في انطباعاتنا وحابين لمتهم لينا..

وهما كانوا وصلوا لاكثر مراحل نضجهم من الحياة والتجارب
وبالتالي القعدة وسطهم ذكري ماتتعوضش
ماحدش هتحسه يخاف عليك ادهم
لان كلامهم طالع من القلب ودعوتهم بتطمن ..

الطيبة هنا في الذكري .. مش في شريط حياتهم
بل ما يتركوه من اثر بداخلك ..

صعوبة الحياة بقا واللي عاشوه في حياتهم وقاسوه
احنا بمعايير حياتنا الموجودة حاليا مانقدرش نستحمله
يعني تخيل مثلا الكهربا لما بتقطع ساعتين في الحر ده
احنا بنكون عاوزين نروح نضرب اللي قطع الكهربا بالنار

هما مثلا لاء ماكنش في مراوح ولا تكييف ولا غيره
بس من وهما صغيرين متعودين علي كدا
واجسامهم بتتكيف علي كدا ...
وبيختلف برضه شكل التنشئة عن دلوقتي
وبالتالي الرفاهية مش خيار سهل ...
ولكن فيه اوقات كتيرة جدا في حياتهم
ماكنش ماليها التليفزيون و النت زي حاليا
وبالتالي هما كان عندهم وقت اكتر لبعض ...
وده يمكن اللي بيخلق ذكريات اكتر عندهم مننا ..
وبيخلي المواقف والاخلاق تترسخ اكتر عندهم ..
وبالتالي اه ... هما جيل الطيبين ... لانهم كانوا اطيب مننا
والجيل اللي قبلهم اطيب لانهم كانوا قريبين اكتر من الفطرة ..
زي ما احنا هنكون اطيب من الجيل الجاي بكل سوئاتنا ...
بس بنبعد اكتر بشكل ما عن فطرتنا ..

لان من رأيي الاجيال بتستوحش
لانها بتتجه اكتر للعملية اكتر منها ترابط واسرة ...
بتتجه اكتر لرفاهيتها علي حساب الجزء القريب منها
صبرها قليل وبالتالي افعالها العنيفة اكثر ..

المهم خلينا نحتفظ بالجانب الحلو من ذكرياتنا وخلاص