بمناسبة الشعر والشعراء
اللي انا مش منهم ...

مرة كنت قاعد بتفرج علي فيلم interstellar
بتاع ماثيو ماكونهي ..

الفيلم معروف عامة .. وكان بيكلم كالعادة
ان الارض خلاص فاضل عليها تكة
ونقول البقاء لله فيها .. وهيطلعوا عليها من صلاح سالم
وكان لازم يدوروا علي كوكب بقا صالح للعيش
وحوار كبير كدا عشان ماحرقش للي ما تفرجش
واغلبه بيتكلم علي الزمكان وحوار كدا ...

المهم اشوف الفيلم واسكت
لا ابدا ..
قمت رازعه قصيدة عامية
من غير اي سبب .. ولا مقدمات ..
و غالبا يعتبر ماحدش فهمها لما نزلتها ولا حبها
وهي اصلا سيئة بس انا بحبها رخامة كدا
والله ما اعرف ليه.. بس عجباني
واللي هيقراها بقا يبقي حظه ونصيبه
اعملك ايه يعني ...
القدر قرر ..


..
.


خط الزمن قادر في يوم يجمعنا
وفي نفس ذات اليوم
لحظة أمل عارجة قادرة تفرقنا ..
عكس الزمن آلة بدون معني
جلاد وما بيرحمش
فارغ مالوش ماسكة
مالوش مالكة
بٌعد في فضاء طاغي علي المعني
بسحره يغوينا
لدرجة النسيان
أنه بأبعاده
هندسته متوازية مع صموده
جواه سواد قاتل
قايم علي غموضه
حكايته والإنسان
مرتبطة بصعوده بأحلامه و الجنة
وأنه ابعد نقطة لوجوده
هيوصل فيها لمحطة
و يستني

وبعدها يرسم الخطة
وبسعادة يتآني
ويترجي
أنه ينول الفهم للمادة
يجمع خيوط الزمن
وبايده يملكها
يوصل لضوء الشمس
من غير ما يلمسها
وفي لحظة ينسي القمر
شريكه في أحلامه
وأول أحبابه
أول ما راح باعه
وأشتري لجامها
وبنورها سجانته
وبحلمه سجانها ..

لحد ما بتحرقه شمسه
وبتفكره
أنه بسيط الفكر والمعني
ومهما وصل علمه
مسيره في محطة
يبقي و يستني

ويرجع تاني لجيرانه
تحتضنه أحلامه
ويستأنس بأوهامه
وأنه في حكم الكون نقطة من الذرة
وانه بحكم البشر فارغ من المعني

لكل حلم رجوع
وأساسه فيه الموجوع
دايما نعادي الزمن
ونحمله المرجوع
وكأنه هو الحالم
واحنا احلامه
وكأنه هو الفعل
وأحنا عداده
وكأنه ماسكين له عصا
بندرسه المنهج
ونحس بالضربة
وكأنه هو الأمل
بنسلمه الفرحة
ونحس بالصدمة
وكأننا ناكرين
في دور عاتبين
متنكرين خايبين
بقينا احنا الزمن
فارغين بدون قوانين