العادة بتقول
لما مايكونش فيه محتوي للكتابة
بنرغي في أي سخافة

والنهاردة دماغي رايق
وحابب ارغي مع نفسي كدا واسترجع
ذكرياتي و انجازاتي اللي ما تهمش حد هنا الحمد الله
في فترات الدراسة والتعليم ..
وادينا بنتسلي ..

المهم

حتي وقت مش بعيد
كان المبدأ الاساسي عندي اني
مش بخاف اغلط .. ولا بخاف اجرب ..
سواء بقا في اللي بطرحه او اناقشه
وقبل كدا في جزء من حياتي ..
خاصة ايام الدراسة ..
ودي كانت نقطة قوة خطيرة
لانها كانت بتخرج عندي حاجات
مش شايفها في نفسي ...

وكنت ببرر واقول اهم من انك تغلط
انك تتعلم بالتجربة ازاي تطلع من الموقف الغلط بشياكة
مبدأ حقير بس كان شغال هههه

ايام الامتحانات في المدرسة مثلا .. خاصة في الثانوية
كنت اقعد اتحدي نفسي قبل الامتحانات بشهرين مثلا
واقول انا السنة دي هجرب اذاكر قبل الامتحان
بيومين واشوف هيحصل ايه ..
والمصيبة اني بصدق نفسي واعمل كدا
ومرة قررت اني ا ذاكر مادة ماكنتش بطيق اسمها
قبل الامتحان بساعتين بس
وطول السنة ماحضرتش فيها غير حصة في درس
و فتحت كتابها او تقريبا كان ملخص مرة واحدة بس
والله العظيم ما اعرف نجحت فيها ازاي لحد النهاردة
مع انها في تالتة ثانوي ..
مش عارف لحد النهاردة هموت وافهم
ازاي المدرس اقتنع بالتأليف بتاعي ..

او كنت اشوف الفورمات بتاع الامتحانات
في السنين اللي فاتت شكلها ايه
واختصر المذاكرة للنص ..

الامتحانات عندنا كنت بحسها غبية برضه
والدراسة والله ما تفيد حد في حياته اساسا ..
الامتحانات ممكن تعرف شكلها ايه مع نفسك
لو لاعبتها سودوكو

يعني مثلا وليكن العربي
فهمت انهم مثلا القصة بيجيبوا قطعتين من فصلين
قطعة من اول خمس فصول
وقطعة من تاني خمس فصول

وهتشوف مثلا اخر خمس سنين في الامتحانات
الفصول اللي جات في امتحانات قبل كدا
وتقلل الخيارات ... بدل ما هتذاكر 10 ولا 15 فصل
هتذاكر 3 فصول ..
وقيس علي كدا بقا في كل المواد الادبية

اما الجبر والتفاضل ولا المواد العلمية والحاجات دي
فكانت في اللذيذ ..
انا كنت اشوف الاسألة والاجابات في الكتب الخارجية
ومع نفسي كدا اتسلي واتعلم طرق الحل
من غير مدرس ولا بطيخ ..

الموضوع فيه ريسك بس كان مسلي ...
وانا اصلا مش بعرف احفظ ..
انا اقرأ كويس علي قدر ما استطيع ..
وادخل بقا اربط الجمل مع بعض .. وربك بيسهلها ..
انا اصلا بستمتع بأي حاجة لما اكون تحت الضغط ..
غير كدا بعمل الحاجة وكأني عاوز انام
وعشان كدا كان عندي شوية قرارات باخدها بيني وبين نفسي غريبة الشكل واللون.. كل ما افتكرها اضحك ..

وماكنش اصلا حد بيروح عندنا مدرسة في ثانوي عشان حاجة تثبت
في الدماغ .... وده كان الطبيعي

وكان الاعتماد علي الدروس بس ...
في الدروس كنت اوريهم وشي كل شهر مرة زيارة ولا اتنين
اللي كان يحرج المدرس انه يقولي ماتجيش تاني
اني اتعودت قبل ما اروح الدرس
اسأل الجماعة صحابي هما واقفين فين
واذاكر اخر درس خدوه ... واذاكر الدرس اللي هياخدوه ..
انا اهم حاجة لما يسأل ارفع ايدي زي العالم القاعدة دي
واجاوب صح .. تحسه روتين مكرر في الدروس ..

وبعدين كان في اعتقادي وقتها او الصورة اللي واصلة ليا
هو ايه اللي المدرس عاوزه غير سمعة
في ان الناس اللي بتروح عنده بتنجح ..
فيكتر الناس اللي بتروح عنده درس السنة اللي بعدها...
فيستثمر اكتر في انه يخليك قادر تنجح ..
بس مش شرط يكون ليك بعد نظر في مستقبلك...
مش شرط تتفهم المحتوي بشكل تام بقدر ما تتفهم
الامتحان هييجي منين ..عشان تقدر تحل ..
احنا كنا بنذاكر عشان الامتحانات
مش عشان المستقبل ..

ولو انت فرضا مش حابب الدراسة او ربما اقل من المتوسط
هو هينبذك قدام اهلك عشان يخلي مسؤليته من فشلك
وده كان بيحصل قدامي ..
بس مش هيخسر العائد المادي منك
ومش هيحاول يعرف القصور عندك
هو هيحاول فقط انه يوصل صورة
انك ماتتحسبش عليه تلميذ وفشل ..


المهم
انا غالبا كنت مثال للطالب الفاشل الناجح الشيك
كنت احب اعمل ريسكات غبية
مش فاهم ايه لازمتها
غير انها ثقة زيادة بدون مبرر واضح
وبتحفز الادرينالين
وسبب استمراريتها لوقت طويل معايا
ان الريسكات دي كانت بتنجح
فأزود في الغباوة ..


لأن الصراحة التعليم عندنا بالقائمين عليه
كانوا عاوزين ضرب النار .. خاصة في المراحل الاساسية..

انا فعليا طول عمري ناقم علي طرق واساليب التعليم بتاعتنا ومش بحترمها
حتي اسلوبي ايام الدراسة اللي كان ممكن يضر مستقبلي
لما بفكر فيه بشوفه هو كان مجرد تعبير عن عدم الاحترام
والكلام اللي قولته فوق بقوله بغصه علي قدر انه كان احيانا بيضحك

مش عارف .. حاسس ان الفرص بتاعتنا
فاننا نعمل ما نحب كانت ممكن تكون موجودة بشكل افضل
لو كنا واحنا صغيرين حد قدر يوصلنا الخيارات بشكل احسن
ويحفزنا بشكل افضل ...
يمكن في مدرسين احسن .. يمكن في مدارس احسن
بس انا بكلم من واقع تجربتي ..

اصلا اسوأ مشكلة بتقابلنا علي الأقل عندنا
ان التعليم مابقاش رسالة وليها قيمة
لأن المدرس في الغالب بيحط الرسالة في جيبه الشمال
وفلوس الدرس في جيبه اليمين هههه

مش هننكر عليه حقوقه ..
بس المفروض المعلم يتفهم قيمة الرسالة اللي بيحملها

والمجتمع يتفهم مكانة وقدر المعلم ويعيد تشكيلها من جديد
لأنه فعليا احنا في الحضيض للسبب ده