الانترنت فيه جزء كبير منه غير مستغل
احنا بس مش بنستغل غير الجانب السخيف منه مش اكتر ..

انا هتكلم بشكل عام عن تجربة ..
في فترة قضيتها تسالي كدا من حوالي سبع سنين
في حوار الربح عبر الانترنت ..
يعني تقريبا جربت كل حاجة ..
عشان استغل هواياتي زي ما بتقولي كدا ..
بس الموضوع محتاج صبر .. ومثابرة في البداية ..
لأن الفرض قلت .. والمنافسة بقت عالية ..
ومافيش حاجة سهلة .. ولازم نتفهم ده ..
الا اذا امكانياتك هتفرض نفسها بالمقارنة مع غيرك ..

بس الطبيعي ممكن يحتاج منك علي الأقل من 6 شهور لسنة
عشان تقدر تدخل اول دولار لجيبك
وتقدر تفهم العملية بتتم ازاي
ومحتاج سنة واتنين عشان تعمل اسم بشغلك واسلوبك ..

بس الموضوع فعليا مجزي لو انت واخده علي سبيل الهواية
و مع الوقت هيكون ليك دخل
و لو انت بادئ الموضوع وانت شاب في جامعة لسا ..
هتقدر تؤسس ليه بمزاج ..
او واخده زي وظيفة تانية في البداية
بتؤسس ليها في وقت فراغك
بس البوتينشال بتاعها عالي ..
و هتكون احسن من وظايف كتييير جدا في المستقبل ...

اولا

فيه مواقع الفري لانسيرز

زي موقع
freelancer او upwork او fiverr

والمبتدأ ممكن يبدأ من موقع عربي
زي موقع مستقل ..
موقع بالعربي .. ممكن تفهم من خلاله التجربة بشكل ما
بشكل ابسط .. وبعدين تسجل في الاجنبي

مواقع الفري لانسير مجالاتها متعددة ..
ببساطة انت مثلا فرضا عندك قدرة علي الترجمة ومعاك لغة او اتنين
او التصميم مثلا باستخدام الفوتو شوب او الاليستريتور زي بعض الاعضاء هنا
او حتي التصوير ... كل المجالات دي ليها تصنيف في المواقع دي
كان فيه والله ناس كسولة بتطلب حد ينزلها قايمة اغاني من علي النت
ب 30 دولار مثلا ... في طلبات غريبة مش محتاجة دايما تخصص
علي قدر ما محتاجة فهلوة عالمواقع دي
وانك تسبق وتقدم سعر منافس لشغلك في البداية ...

وفيه برضه ناس بتطلب تصميم المواقع
او لو ليك في البريميير بقا والافترافيكيت
وبرامج المونتاج عامة.. ليها برضه زخم كبير
وخصوصا ان المواقع دي معظم اللي بيطلب فيها من اوروبا وامريكا ...
الحاجات دي بتضيف رصيد ليك
في البروفايل بتاعك لو انت ليك باع فيها ..
وليك تجارب او تصميمات تقدر تحطها فيه
وبالتالي يكون ليك اولوية في الاختيار ..
لما الناس اللي بتعرض الشغل عالموقع
تشوف شغلك عامل ازاي ..


ثاني هام

انا مش عارف دلوقتي الموقع ده بيقبل لسا ناس ولا اكتفي
لأن التسجيل فيه اصلا صعب جدا
بس هو جنة للمصممين بالذات ..
ولو حتي ماخدش غير ا ب فوتوشوب
وكان سهل جدا الشغل فيه ببدايته
وهو merch by amazon
وكان ميزته انه بيسوق نفسه
وسوقه في اوروبا وامريكا اكتر حاجة .

بس لو فيه حاجة شبهه
اللي حابب يبحث في المجال
وتصميم الميرشات للتي شيرت وكدا
اعتقد هيستمتع يعني ..
اللي حابب يقرأ عنه هيفهم قصدي ..

وفيه حاجات تبع الفوركس
وفيه حاجات ماعتقدش تناسب الكل
فيه حاجات كتيرة عالانترنت عامة بس محتاج معافرة كتيرة
هو كلامي عامة خطوط عريضة .. مجرد تفتيح دماغ. .
ممكن تلاقي الاحسن بالبحث
بس الاهم وانت بتبحث ماتجريش ورا االامال الكدابة
وشغل اليوتيوبرز انك هتدخل تكسب الاف بسهولة وكدا

وامشي وري اللي محتاج جهد و يناسب قدراتك
لأن ده الشئ الحقيقي في الانترنت ..