دايما في الافلام والمسلسلات
هتلاقي كلاشيه محفوظ
بتاع الدكتور النفسي وهو بيستقبل مريضه
ويخليه ينام علي الشازلونج
واول حاجة تلاقيه بيسألها عنه
في بداية المعالجة غالبا بتكون طفولته ...

مش عارف اللي هقوله ده رزع ولا ايه
بس علي حد فهمي دايما الأطباء النفسيين
بتدور علي الفترة اللي المريض
بدأ يفقد فيها تقديره لذاته ...
او بدأ يتخلي عن فكرة
شعوره بالاستحقاق في بيئته ...

عشان يقدر ينتزع من المريض اعتراف شعوري
انه فعلا عند مشكلة في تقدير ذاته
لأن الاعتراف بيكون اولا طريق العلاج ..

دايما قلة تقدير الذات بترجع ل 3 اسباب :

*هو انك دايما بتحط نفسك في مقارنة بينك وبين غيرك
*وبتسعي طول الوقت ان افعالك تكون مثالية
*وبتضع نفسك تحت ضغط التوقعات اللي هي غالبا
اكبر من قدراتك لأن توقعاتك لنفسك في الجانب المعاكس لقدراتك

بس الاحساس بالانجاز والاستحقاق مهم
ولكن يحتاج فقط التوجيه للشكل الصحيح

* لازم يكون فيه حرص علي انك تقارن نفسك حاليا
بالنسخة الأقدم من شخصك
او ما كنت عليه مثلا من سنة او اتنين او تلاتة
وهل انت قدرت تتخطي توقعاتك من نفسك ولا لاء
مالكش دعوة بغيرك ... يولع غيرك والله ما هيفيدك ..

*فكرة السعي للمثالية هي اكبر خطأ ممكن نقع فيه
لأنك بقدر ما بنسعي للمثالية بقدر ما بنفقد جزء من متعة الحياة
وفي نفس الوقت عمرنا ما هنوصل ...
لأننا مع الوقت هتتصنع وهتبقي شخص غير نفسك ..

* اما التوقعات فهي اكبر كذبة ممكن تقع فيها
لأن لو اتحررنا من ضغوط التوقعات الي المجتمع بيثقلنا بيها
هنبدأ نتعامل اكتر مع الحياة بالفرص المتاحة بواقعية اكبر ..
لأن ما يحدث من خير دائما هو ما لا يتوقعه احد ..