صلاح البيوت مرتبط بفهم الزوجين
للقوامة في الاسلام بشكل صحيح

باختصار الزواج

تكليف للزوج ... وتشريف للزوجة ..

ولكن ما حدث أخر العقود جعل الأمور تتشابك
يعني مثلا سمعت في بودكاست
كلام خلاني افكر بشكل مختلف

بمعني
دلوقتي في فئة من الرجالة وهي مش قليلة
لما بقت تحب تتجوز
بقا من مواصفات اختيارها
ان الست تكون بتشتغل بسبب زيادة الأعباء المالية في الحياة

فهنا هيكون في خلل في تطبيق مبدأ القوامة نفسه
لأن الاتنين بيتشاركوا مسؤلية البيت
تحس الموضوع مش راكب ..

تحس ان ده مع الوقت بيبني غالبا خلافات اساساتها
موجودة من قبل الزواج اساسا ..
محتاجة بس عود كبريت يولعها
فبيبدأو يتعرفوا عليها في اول محك او اختبار لعلاقتهم
الزوج فيها بيحاول يقود العلاقة الزوجية فيه بقوامته ..
فبيتفاجأ انه لا .. انه مش القائد ..
فبقا فيه تضارب رهيب
تحس ان بقا فيه اختلافات ما بين زمان ودلوقتي
محتاجة نقاش ديني مجتمعي عشان
تحدد الهوية الجديدة للمجتمع اللي عايشينه
بس يا هل في اساس في المجتمع حالا هو قايم بذاته
تقدر تبني عليه نقاش من النوع ده ..

اعتقد لا

لأن انت بتسأل نفسك في موقف زي

هل الرجل قايم بدوره في الحالة دي ؟
لا
هل الست فاهمة دورها ؟
برضه لا

دي فعلا حاجات لما سمعتها
استوقفت تفكيري
مش عاوز اقول باطل بيبني باطل
بس حياة عكس المفاهيم الدينية اللي المفروض اتربينا عليها
وبيتنشأ علي أساسها مفهوم الزواج حاليا

وقيس علي كدا حاجات كتيرة اتغيرت
دي مثال بسيط ..

يعني برضه سمعت حاجة جميلة

تيجي نسأل نفسك
يا هل في ظلم واقع علي المرأة ؟
هتقول اه
بس المشكلة اللي ان اللي بيوجهوا
الخطاب اللي بيدافع عن المرأة
هي المرأة اللي مش واقع عليها ظلم اساسا
فمش فاهمة نفسية المرأة المظلومة دي
احتياجاتها ايه ولا عاوزة ايه ؟
فبتتاجر فقط بقضية المرأة
فكل واحد فيهم بيكلم بموجة صوتية غير التانية
في المجتمع
وتقعد تتطالب مثلا بفكرة انها تلغي التعدد بتاع الزوجات
هي مقضياها علاقات من غير زواج
والتانية اللي بتقبل تكون زوجة تانية
هي اصلا مش لاقية زوج .. فبترضي ..
عشان ما تعملش حاجة حرام
زي اللي الأولي بتحلل الحرام لنفسها
وتحرم الحلال عشان تقبض ناس تانية من فكرة
الدين حللها ..

فماحدش فاهم موجة التاني

الصراحة الكلام عجبني فحبيت اضيفه هنا
لأن كلنا محتاجين نطور مفاهيمنا التقليدية
عن فكرة الزواج ... ونناقشه بلغة عصرنا
عشان نحل اشكاليات كتيرة بقت واقعة
محتاجة فعلا ناس فاهمة تقود المجتمع للصح