" الضربة اللي ما بتكسرك بتقويك "
كنت دايماً اسمع هالجملة وأمر عنها، لاني كُنت موقنة ان الضربات دايماً تجرح وتترك أثر فينا وهالأثر يكون مصدر قوة لنا بعدين
وفعلاً عايشت هالعباره
- في شهر 10 من سنة 2021
زي ما قلتلكم من قبل انا دراستي بالاردن لعدة أسباب
وبهذا الوقت كانت كورونا منتشرة بشكل عام
فتفاجأت بيوم بخبر إصابة ابوي بالمرض
ما احكيلكم عن المشاعر اللي عشتها وقتها
بس ما اخفيكم اني ما كنت بذاك الخوف لإني لوقتها كنت مستهينة بالكورونا
على إنها انفلونزا وتعدي
وكل يوم ادق اسأل عنه ما يوصلني أخبار الا على انه تمام
كنت وقتها ودي انزل السعودية بس مافي احد كان مأيد الفكرة
وبرضو وقتها الدراسة كانت يا دوب بادية وهالوقت يعتبر حساس من السنة، فاكتفيت بالجوال للسؤال
ووصلني خبر شفائه، لكن بعدها بإسبوع نمت في ليلة وانا قلبي ناغزني بشكل
صحيت الصبح على صوت الجوال
كان اخوي يبلغني بخبر وفاة ابوي إثر مضاعفات الكورونا
حيث إنه اخر شي صار عنده نقص اكسجين وزيادة ثاني اكسيد الكربون وموية عالرئة
يوم 2021/11/2
صدقاً يومها ما قلت أي كلمة ولا حتى دمعة ما نزلت
ما مر وقت لقيت نفسي بالسعودية قدام كل العيلة وشايفه انهيار الحميع
وانا لا زلت معلقة باللحظة اللي تبلغت فيها بالخبر
بدون تفاصيل كثير
كان هالموضوع ضربة موجعة للأمانة
واللي زادها انه بنفس الوقت كثير ناس انسحبوا من حياتي
واكتشفت إني ما عرفت اختار الناس بحياتي
فحسيت فعلاً أن خلاص ما فيني أي طاقة اقدر اكمل فيها
بس ودي اجلس بالسعودية بالبيت اللي قضيت فيه كُل العمر واللي بكل ركن فيه ابوي له ذكرى
نويت اسحب من الجامعة لكن امي والعائلة ما تركوا مجال
ما مر وقت إلا وانا راجعة على الاردن
دخلت بحالة شبيهة بالاكتئاب وتراجعت من كل النواحي وخاصة الدراسة من الامتياز للجيد
واستمريت بنفس الحال إلى يوم 2022/9/17
اللي هو يوم ميلادي، أخذت قرار إني هبدأ من جديد واعوض الانتكاسة اللي صارت
انكسرت كثير من بعد " هالضربات " بس رممت حالي وجالسة احاول اصنع احسن نسخة من نفسي
والحمدلله على كل حال
الفكرة من كل الكلام اللي قلته انه لا تسمحون لأي شيء بالحياة يوقفكم
الحزن ان ما عدا بكره بيعدي اللي بعده
ولا تكتموه داخلكم، فرغوه أول بأول عشان ما تنفجرون دفعة وحدة
..
حبيت اشارككم هالموضوع كحافز رُبما، لأي احد الحزن متملك قلبه
وكأول مره اتكلم فيها عن الموضوع ارتحت فعلاً
ونهايةً الله يرحم امواتي وامواتكم ويغفر لهم