،.


اذكرك والسما تحضن بداخلها مشاعر غيم
إذا قلب السما يشتاق ،، أنا لرضاك مشتاقة

هبوب الفقد ياخذني ويملاني جفاف وديم
جفاف الذّكريات الموجعة .. ودموع توّاقة

هطلت بغيبتك مزنة حزن واجتاحني تسليم
مثل ما تسلّم القمرا لنور الشمس مشراقه

سكون الشمس ما حرّك من الهيبة ولا التعظيم
رغم ما كانت القمرا لها .. أنوار سرّاقة

غرورك علّمك تقسى ، وانا من قسوتك أهيم
وإذا هذا الغرور اعماك ؟ كل نفس ولها طاقة

خطيت بحق حبي لك وجرعت المحبة ضيم
بعد ما ارتوى غصنك من الحب وروى ساقه

نبت في داخلك كبر واثمر داخلي تحطيم
وانا اللي كنت ما تقدر على بعده أو فراقه

أجرّ لخيبتي حلم .. وقيد الامنيات يتيم
ترك لي جرح للذكرى .. وانا يقتلني ارهاقه

تسّريني مواويلي .. واعزف كسرتي تنغيم
يصفّق للألم جمهور .. ويهديني الحزن باقة ..!!