انا عندي مشكلتين معاك والله يا زميل

الأولي اسمك ههه
صراحة يا ريت تقول اسم تاني اناديك بيه

التانية

انك بترسم هالة كدابة في كلامك حوالين الناس طول الوقت واولهم انا
سيبك من التصنيفات التعبانة وحوار فرق المستويات اللي في دماغك دي..
كله بيرزق ..

بشكل عام
مشكلة الناس بس انها مش بتركز في الكلام اللي بينكتب
وبتمر عليه مرورا مش اكتر في الغالب ..
لو ركزت في الجمل غالبا هتلاقيها مليانة تناقضات
لو ركزت في المضمون هتلاقيه منزوع منه ..
لو ركزت في الفكرة هتلاقيها مجرد روتين مكرر
لأن ماحدش عنده افكار اصلية اللي بيتقال عليها اوثينتيك
كلها أفكار اتهرست فكريا وفلسفيا
بس مجرد أنه بيحاول يضيف ليها لمسة
من ردودك أنت لما تثير جواه رد فعل تجاهها
وبالتالي ممكن يتعمل حالة من لا شئ
وبالتالي مثلا في النقاشات
المؤثر الأكبر فيها هو اللي بيعلق
مش صاحب الطرح

وبالتالي اي حد جاهل ممكن يتشاف نابغة
لمجرد انه بيعرف يركب جملتين فوق بعض
تركيب الجمل فرع تويتر ده
بيأكل ناس عيش كتير ...

90 % من كلام المدونات
كلام منقول..
بس قليل اللي بيكتب تحته
منقول .. فبيتنسب ليه الانتقاء بتاعه

الشخصية المتمردة غالبة متشافة في المنتديات
وبالتالي كل ما تتكلم عن نفسك بصيغة اللا مبالاة
كل ما تزيد الفضول حواليك ..
كل ما تظهر للناس أنك مش فارق معاك حد
غالبا الناس بتودك لأنك بتمثل الشخص اللي هما
عاوزين يكونوه ومش قادرين .. .
كل ما تزيد اهمال
كل ما يزيد الود ..

شوف
مفاتيح الوصول لدماغ لناس فكريا سهل
الفكرة بس انت مين في الناس مش اكتر ..
ده لو انت شخص درامي بتاع افلام ..

ولو انت شخص عاوز يكون بتاع ألغاز
فاقرأ كلمتين من عصور النهضة الاوروبية
واعرف كام فنان ... وافهم مغزي كام لوحة رسموها
وشوف كام جملة لكام فيلسوف
وهات شوية مصطلحات قليل استعمالها
وابينها علي شوية صفات لكام فيلسوف
في كام فكرة اتبنت في عصور احنا ماعشناش فيها
بس غيرنا هوايته انه يقرأ فيها
يعني مثلا لما تكلم عن الحب .. أكلم عن تفردك فيه
مش كلغة تناسب كل العالم فيه

وبالتالي جمال لغته في جهلك بيها مش اكتر
وجمالك أنت .. انك تناقشه بلغتك ..
حتي لو هي مش رايجة ..

هيجيلها يوم وتكون في التوب
لأن الناس بتتغير .. والأيام بتتغير
والأفكار بتدور في فلك الناس كلها
مش في فلك شخص واحد فقط ..

الناس دايما هتحب فيك نفسك
لما تحاول تظهرها بشكلها بدون مبالغات
او اسفاف في النهاية ..

ماتديش قيمة لحد اكبر من قيمته كفكرة اجمالا
فقط اعطي الكلام اللي بيكتبه في اللحظة
اللي بتشوفه فيه الكريديت بتاعها مش اكتر ..

انا بعتذر طبعا لأمل
ان الموضوع خرج عن إطاره ..