من 6 سنين تقريبا
كان في زميل معانا في منتدي سابق
كان بيعمل لقاءات صوتية مع الأعضاء
وكنت من الناس اللي استضافهم ..

معلق معايا احد التعليقات
لما قال واحد صاحبنا

يا رجل ما الدنيا سهلة ايه
اللي قدرت توصله بالصوت
اسهل واقرب بكتير للقلب
من اللي عمال تكتبه من سنين ...

لأن كان ايامها حوار الثورات والفوضي
ده اللي مسيطر .. والهري كان كتير ..

انا اعتقد أن كل ما بتزود في استخدام حواسك
لايصال وجهات نظرك
كل ما بتكون اقرب للواقع اللي عاوز توصله
وكل ما بيكون ليك تآثير اكبر ..
والوصل بيكون اكبر ..
ده لو عندك القابلية لده ..

بس مش دي النقطة الجوهرية
الفكرة فمين أنت ؟

يعني شخصيتك احيانا بتفرض عليك
أنك ترضي بما يناسبها ..
يعني لو انت شخص خجول
و انت مرتاح بوضعك
فطبيعي لو اتغير شكل المكان
هتدور علي غيره ..
لأنه مابقاش في منقطة الراحة بتاعتك ...

ولو حدث متغير
تخليك متحفز أنك تعمل لشخصيتك تحديث
وبالتالي تأخذ بنفسك لخطوة قدام
بشكل مختلف ..هتبحث عن بيئة ...
تلاقي فيها نفسك بشكلها الجديد ..

او وضع تاني بشكل تاني
فأنك تطور من نفسك لخطوة ابعد
يعني كان معانا ناس في المنتديات
الفت روايات ونشرتها ..
وبقت جزء من كاريرها ..

اما حوار تغليف الشخصيات ده
فأنت بوشك ولا بظهرك
مش هيقرب منك غير اللي علي شاكلتك

ومش هينخدع فيك غير اللي عاوز يهرب
من نفسه فيك ...

كل واحد ابن نفسه
مش ابن حد تاني ..
مش فارقة صوت من صورة من كتابه

وغالبا الناس حاليا
مابقتش تفرق معاها اللي بتكتبه
بقدر اللي بترسمه علي وشوشهم
لما يقرأوا كلامك او يسمعوه مش اكتر ..

والرسمة دي سواء هتناسبهم ولا لاء ..
مش هتآثر كتير
لأن في الغالب قدامها حواجز
مغلفة بدبلوماسيات
ومخاوف أكبر من أنها تظهر

لأن شريحة الناس اللي في المنتديات حاليا
العفوية مابقتش تقودها
بقدر ما انها بقت بتفكر الف مرة قبل
ما تكتب كلمة ..
لانها ما بقتش تناسب عمرها
او تناسب الفترة دي من حياتها
بشكلها الاجتماعي ...

كله بقا حاسس انه قديم
وحابب الشكل القديم بتاعه في الغالب
بس مش قادر يوصل
قديمه بشكل جديد
مش اكتر ...

لأن النسخة الحالية من شخصيته
مسيطرة عليه ومش قادر يخرج
بره الاسكريبت اللي كتبه ليها
في لحظة نضوج ..