انا بصراحة ماليش ميل للنقاش من فترة
بس حابب ارمي كلمتين

جميل ان الإنسان ينشغل بحاله فقط
بس فكرة ان الإنسان يعيش بمبدأ
زايف أمر محيرني من زمان ..

بمعني اللي ماترضهوش لنفسك
ماترضهوش لغيرك .. ولا تكون جزء منه ..

كلنا عايشين داخل سوبر ماركت مبادئ كدا
بتتجزأ علي حسب المزاج
في يوم بنحب المبادئ بطعم الأناناس
واليوم التاني بنحبها بنكهة المانجا
والتالت بنكهة البطيخ

يعني
بنفصلها علي مقاسنا ومزاجنا ..

يعني مثلا الخواف
لو المبدأ أنك لو عندك القدرة أنك تمنع أختك
من دخول المنتديات هتمنعها عشان الإختلاط

فالأولي أنك ماتكونش جزء من هذا الإختلاط
بحيث ما يتردش القلم ليك ..

لما اختك تقولك مثلا
ما أنت مثلا قاعد بتناقش فلانة وعلانة وبتختلط عادي
ايا كانت نواياك بقا .. انت رجل ملتزم ولا لاء
صدقني أنت حظك فقط أنك يمكن ماتمش اختبارك
عشان تعرف انت فين من نفسك
وفين من المكان اللي انت فيه ..

الفكرة أنك لازم لما تحكم علي أهلك
تكون مثال ليهم ...

انا مش بقول اني ضد كلامك
بالعكس انا لو حابب الخير لأهلي
هحب ليهم كل شئ يرضي ربنا ...

ولكن طالما مش قادر احكم علي نفسي
فبأي منطق هحكم عليهم باللي بحلله لنفسي
حتي لو عارف اني غلط .. وبقولهم اني غلط ؟ ...

فلو هتجادلهم بمبدأ حبك ليهم
وانت مش مهم .. وهما أولي بالخير
اللي انت شايفه ليهم

فالجدال ده خسران قبل ما يبدأ
لأن في زماننا الحجة دي
مابقتش كافية للاقناع

صدقني
البنت في العيلة أو الولد
لو الأساس التربوي بتاعهم مش صح
فأنت كلامك لا هيقدم ولا هيأخر معاهم
ولا رقابتك هتفرق في حاجة ..

ولو الأساس صح
فالثقة هي مبدأ التعامل الوحيد
مش فكرة أني احكم عليها
او اركب كاميرا علي قفا كل واحد فيهم ..

ولكن المشكلة الوحيدة
ان فيه فجوة زمنية تربوية
بين اللي جيل اللي فات اللي ربا
وكان متخيل ان الزمن اللي جاي
مش هيفرق كتير عن اللي فات

وبين اللي الجيل الجديد
اللي هما من سن 10 ل 30 سنة
اللي هما فعليا تربيتهم ماكنتش كافية
في الغالب لمغريات الزمن ده ..
و تربية التليفزيون والشارع والانترنت
كانت اقوي من تربية اهلهم ليهم
وتأثيرها أعلي ...

مش هنكر أن الموضوع معقد
بس الأساس الأخلاقي لو واضح
ومش محطوط عليه تراب لأي بني أدم
الدنيا هتكون أوضح ..
ومش هنحتاج نتكلم ..
لأنه عارف طريقه

لأن في الغالب
الأكثرية متغمية تحت فكرة الحريات
والأقلية عايشة بخيالها في مثاليات
مش قادرة تطبقها علي نفسها
فوق ارض الواقع