بعطيك بعض من ذكريات الطفوله ..
كوره وحب وحاجات ثانيه ..
....
نبدأ بالكوره..
الوالد رحمة الله عليه كان شديد وصارم معنا ..
وكان ابو الحاره كلها ..
م اعتقد فيه احد من شلتي م انجلد من ابوي ..
يعني اذا ماهفه بكف جلده بكلام اقسي من الكف..
وهالكلام يسري علي بقية الجيران ..
كل اب لواحد من شلتي او الحاره كان بالنسبه لي اب واحتمالية تعرضي للنقد والجلد اكبر مقارنه بعدد الاباء واكيد راح اتعرض للجلد والتهزيء واكيد بـ صدر تخنقه العبره في كثير من الاحيان لأني لو برد عليهم بنجلد من ابوي ...شلون ترد علي واحد كبر ابوك الا "القم" وانت ساكت ..
وكنت انا وشلتي وكل عيال الحاره "نلقم" كفوف وماتيسر من جلد بنفس ردة الفعل..
نسكت ونبلعها وشويات وننسي ونرجع نلعب ونضحك مع بعض..!
مره "قفطني" انا وشلتي نلعب مباراه في حاره بعيده عن حارتنا ..
يعني ممكن نوصلها كعابي لكن "بعيده" بحسب مقاييس ابوي رحمة الله عليه..
هو يعتبر الخروج من الحاره كِــ شق عصا الطاعه والخروج علي ولي الامر..!!
المهم اخوي الصغير فيه "نذاله" نشأت بسبي دون قصد مني لكن بسبب اني ماحب اخذه معي يلعب لانه مايعرف يلعب وانا ابي ناس "تفت" كوره وابي افوز وكذا ..
المهم مثل ماقلت لك كنا فالحاره البعيده وراح اخوي واسمه "بندر" غفر الله له بتبليغ ابوي بمكان تواجدي ..كان "جوجل ماب" لابوي قبل طلعت جوجل ...
شفت جوجل ماب ..مكان ودبوس....هو الدبوس/المخبر هههه
المهم مادريت الا ابو جاي بجمسه البهباني داخل الحاره ياولد حسيتني مروج مخدرات وطابين عليه المكافحه هههه
المهم وقف في وسط الملعب قسم انا والفريق كامل من الحارس لرأس الحربه هجينا واطلقنا سيقانا وكراعينا لاقرب طريق يودينا لبعيد عنه وعن مطارده لايعلم الا الله متي تنتهي..
المهم مريت بسرعة الريح وكانت امي واقفه بيني وبين دخول البيت بتعليمات صارمه برضو من ابوي عشان انقفط وانجلد فغيرت مساري ودخلت في "زقاق" او "داعوس" او"ممر" واسمع صوت قواطي وعلب بيبسي وهي تبنط فالجدران من اثر "حوافر" الشله اللي معي نظفنا الطريق وحنا نركض من الرعب والخوف ..
مالك بالطويله الوالد لياقته حلوه وسريع لكن عجز عن اصطيادي ودخلت بيت واحد من الشله وطمرت من سور بيتهم لبيتنا ودخلت غرفتي وانخشيت في دولاب الملابس كان بيني وبين الجلد مجموعه من السراويل المعلقه والثياب والمكان مظلم هذي اللحظات اللي م انتظر فيها نور هههههه
النور رعب النور دولاب مفتوح وانفتح باب الدولاب وياليل م طولك انجلدت جلد "خضييير" بعقال عريض ولين كنت مره احسه بجنوبي ومره بخدودي ومره براسي كانت حركة العقال خفيفه وسريعه كخفة الاشياء وسرعتها في يد ساحر ههه
وللحديث بقيه..