نتابع...
المهم زي ماقلت لك كان ابوي رحمة الله عليه شديد والسالفه مو علي الكوره بس لا ..الا حتي علي الصلاه فالمسجد ..وكنت اصلي فالمسجد ومع الوقت تعودت وصرت اصلي حتي صلاة الفجر اصليها و اذا تأخرت يجيني ويقومني من عز نومي بصوت ابوي حنون مرهف الحس لين"العريكه" قم ياحمار و صل ياحمار اهم حاجه "صل" او "قم" متبوعه بـ اداه من ادوات االأشاره متبوعه ايضا بـ" حمار" يصبهم كجمله قاسيه في اذني لين اقوم ههههه
وكنت اقوم وكنت اصلي مع قناعتي ان الحمار بطبيعته ماله فالصلاه وصوته نشاز وقبل كل شيء حيوان بس عاد خلص تعودت اصلا لو يقولي قم صل وينسي "ياحمار" ماقوم هههههههه
الحياه صعبه بس كان حنون فعلا لكن كان بارز في اظهار قسوته اكثر من حنانه اللي ماخذ مساحه من صدره وفي دمه اكثر من القسوه لكن الظاهر انه كان يتبع سنن من قبله ابوه وجده وحاول يمارس نفس الدور معي الله يرحمة وبس..
مره صار لي حادث قوي في يوم عيد ..واغمي علي نص اغماءه مدري وش اسميها بس حسيت بدوخه وعدم تركيز وماكان فيني شده اتكلم اغفي واصحي جاه خبر وجاني بعدها لقتيني متمدد في دوريه مو سيارة اسعاف وراسي علي فخوذه واحس كل جسمه ينتفض وفيه رعشه من الخوف علي الين وصلنا المستشفي وعلي طول دخلوني للطواريء وبدو يسوون انعاش وحطو كمام واكسجين وكنت اسمعه بصوت فيه حشرجه" لايموت" الين تحسنت حالتي وصار وضعي مستقر مرت سنين وسنين وبقت "لايموت" محفوره بذاكرتي يمكن لأنها في نظري وفي مقابل الكفوف والشوت والمطارادت سالفه الذكر كانت احن حاجه سمعتها بقلبي مو بـ اذني منه..!!
يالله هذي الدنيا عاد تدري وانا بعد كل هالسنين لو كان في بيدي عندي استعداد اكل كفوف وضرب واذوق نفس احاسيس القسوه اللي مرت علي منه بس اشوفه مره ثانيه عشان اقوله والله اني اشتقت لك واشتقت لـ "صل ياحمار" وبقوله كل الكلام الحلو اللي في خاطري له ولاقلته له في حياته او ان الموت م امهلني ولاعطاني فرصه اقوله له وطبعا حاجات كان يتمناها مني في حياته وتحققت بعد وفاته بعلمه فيها عشان يفرح وينبسط ويعرف ان جلده وقسوته جابت نتيجه ههه

وبس