🟢 بعيدًا عن الدروشة حديث عن حقيقة.
بيان يخصني للي يعرفوني أو اتقابلنا قبل تاريخ الجمعة ١١/ ١١/ ٢٠٢٢ خاصة، ولأي حد حابب يعرف ايه اللي حصل من باب «وأما بنعمة ربك فحدث».
__________
أصبت بشلل الأطفال في سن صغيرة، وعشت عمري ٣٠ سنة كده. راضي ودايما عندي حافز لحياة كلها إنجازات وشعور بالجمال والكثير من الحب. (جامعة، تأليف، شعر، جوايز، حفلات، علم، حاليا بحضر لنيل درجة الماجستير في الأدب).
_________
بعد وفاة أمي السنة اللي فاتت في نفس الشهر ده بتاريخ ٢/ ١١/ ٢٠٢١، كترت الضغوط والمسؤولية علينا أنا وأخواتي، دعيت دعوة في صلاة الفجر قلت كده بالنص وبكل بساطة: (لو انت حابب أفضل كده انا راضي لو شايف ده خير ليا في الدنيا والآخرة، لو ممكن تشفيني ويبقى خير ليا ف دي حاجة سهلة عليك بسر كن فيكون وانت قادر على ده)
بعدها شفت رؤيا بعد الفجر، شخص شكله عالم، شق باطن فخذي واستخرج عرق دم متجلط، رماه ومسح بكفه مكان الشق وشفيت رجلي تماما.
في يوم الخميس ١٠ / ١١/ ٢٠٢٢، كانت أرسلت لنا الحاجة أم هاني (أخ طيب أحسبه على خير هو وأهله من محافظة المينيا) أرسلت لنا الأم الكريمة نوع من سمك النيل، اصطاده أخو هاني، وكانت وجبة الغدا بعد المغرب.
رجعت من الشغل، وذاكرت شوية ونمت وصحيت الجمعة ١١/ ١١ على ارتفاع حرارة جسمي وطاقة وتقل في رجلي المصابة بدوس ع الأرض لقيتها مفرودة تماما زي التانية بمشي لقيت مشيتي اتظبطت باستقامة تامة.
مزيج بين حالة فرح واندهاش وتعجب وعدم تصديق.
____________
مر يومين وطلبت صديقي وأخي الأكبر، الدكتور الشاعر محمود جمعة بحكم قرب المسافة من التجمع لعندي في مدينة نصر، وعلمه وعمله في المجال الطبي لعقود، شرفني بزيارته المُحبَّبة، وانا في استقباله سبقته وقلتله شوف مشيتي، اندهش مبتسما وقال سبحان الله، احكيلي اللي حصل، حكيت له التفاصيل، وشرح لي السبب العلمي موجزا كده (وله حق التصحيح) إن طاقة الكهربا الموجودة في السمكة دي فتحت مسار الموجات الكهربائية اللي بتمرر أوامر المخ للعضلات فانبسطت الرجل بكل بساطة.
والتفسير العلمي متاح للي حابب يستزيد.
لما رحت البيت عرفت بابا، وقال الحمد لله بهدوء وثبات مافيش أكتر من كده وما اعرفش ليه بصراحة😄
___________
بالأمس كنت في زيارة للمجلس الأعلى للثقافة لأمر ما، ومن عادتي لما اكون هناك أسلم على الدكتور أحمد الجعفري، في الطرقة المؤدية لمكتبه شاف طريقتي في المشي قال محمد ارجع امشي تاني وقال عملت عملية؟ ولا علاج؟ حكيتله اللي حصل، شفت في عيونه لمعة الدهشة ودموع التأثر والفرح معا ونده على عامل البوفيه عشان يعرفه وانا بحكي ان لازم يبقى متمسك بالأمل وانه يعرفني من سنين وحصل في لمح البصر كن فيكون.
__________
اللي حصل بنفس التريب كده:
دعاء بيقين، رؤية متعلقة بالطلب الخاص، سبب مادي مباشر لتحقيق الدعاء، تحقيقه في تاريخ استثنائي، صباح التاريخ المذكور أعلاه.
____________
حاجات عايش بيها قبل كل ده.
مش للمفاخرة لكن مازلت بتساءل وبحاول استكشاف الأمر من كل جوانبه.
_ صفت نفسي لجميع المخلوقات.
_سامحت نفسي وسامحت الناس.
_تحملت أنواع متعددة من الظلم البشري، وعفوت.
_بحب الخير للناس وأحيانا أكتر من نفسي.
_ممكن أتصدق بآخر جنيه في جيبي وانام خفيف، أو أرجع البيت مشي.
_ بعد تفكير عميق وعناد وشك، وثقت في وجود الله الحي، ورؤية دلائل مباشرة للإجابة عن تساؤلاتي وحيرتي.
_قدمت الرضا بما أنا عليه.
_صدقته في النية وأحسنت التوكل على حكمته.
_مُقصر في العبادة وبحاول قدر استطاعتي.
_________
شفتها رسالة لازم توصل للتمسك بالأمل والعمل دايما على صلاح النفس وحب الخير للناس والإحسان إليهم وإن أساؤوا إليك، الصدقة ثم الصدقة، ثم الصدقة، واليقين إن لكل شيء سبب وحكمة، الصبر على البلاء، وعدم الاتكال على الصدفة والأحلام.
كونوا بخير وبقلوب جميلة دائما.
محمد ربيع حماد