هالتدوين خص نص لكل اللي علقوا بالتقييم
على موضوع التعامل مع المراهقات و المراهقين
أمس بنت أختي تقول لي ( طبعا بخليط انجليزي على كويتي ) :
خالتي إنتي حدِّك كيوت شكلك من برا Serious بس بالصج يعني غشمرجية و أوبن مايندد
طبعا عطيتها كف و جاوبتها : إي حدّي أوبن مايندد ، أعجبج !
و اليوم واعدتها نروح الأفنيوز !
و الله يستر عليها ، بتشوف ماي مايند الأصلي .
راحت التقييمات
بس أذكر النايفة و أعتقد وسن و غباب و ما أذكر منو بعد
لكن فعلاً
حتى تكسب ثقة شخص من جيل آخر سواء سابق لجيلك أو بعد جيلك
عليك أن تثير إعجابه
هذي الطفلة التي كسائر جيلها تحب شخصيات الإنمي
و دائما تشكو من أن أمها - أختي - ترفض أو تضايقها متابعتها لهم
طلبت منها مرة تحكيلي عن قصة الإنمي
قالت لي أسماء عجيبة و مصطلحات غريبة هههه
تقول : المانجا
أرد عليها : إييييي المنجا لذيذة خصوصا فص و عويس أو ألفونسو
تطالعني شزراً : أي عويس !!!
و أنا وياها نضحك
و فعلاً الحين موسم المنجا لذييييذة
حتى الناس تتداول كلام عن المنتجات المصرية إنها مضروبة و فيها إنّ !!!
و الله ربكم واحد أختار أكبرها و أسمنها و هي خضرا و أخليها بمكان مظلم يومين
و أقشرها مثل البطاطا و أقطعها و أستمتع بالطعم الخيالي
آل مانجا آل !
هذي المنجا صج !