معشوقتي جري القصايد مواويل
لين الهواوي يستلذ بغرامه
مع الفجر والظهر وان خيم الليل
ونوحي ليا من غبت نوح الحمامه
ايه .. افخري بي .. ماعشقتي لك خبيل
ويفداك رجل(ن) ماتشيله عظامه
والى سألك منقل القال والقيل
من هو حبيبك عرفينا مقامه ؟
قولي حبيبي بينكم كنه سهيل
بين النجوم بطلعته واعتصامه
وان ضايقك يام الرموش المضاليل
لاتدفني راسك سواة النعامه
تنومسي بي لعنبو بارد الحيل
مايلحقك يابنت فيني ملامه
قولي حبيبي .. آية العصر بالجيل
قرم(ن) ينومس من يحب القرامه
من متعبين الخيل ذباحة الحيل
لطامة العايل فحول الزعامه
نذر(ن) علي والنذر مافيه تبديل
ياعاذلك مايهتني في منامه
قلته وانا قد الليالي المقابيل
من داس لك جره تراني كعامه
وان كان ماني من خيار الرجاجيل
عطيني البرقع ودوك العمامه