طبعا في مستوى معين من المشاكل بين الزوجين لازم يتم فيه إستدعاء الأهل ... عشان نقدر نحل المشكلة ... وخصوصا لما يكون في ظلم كبير أو تجاوز غير مقبول من أحد الزوجين
لكن ده مش معناه إن كل ما الزوجين يتخانقوا ومايعرفوش يوصلوا لحل ... يقوموا يتصلوا بأهاليهم ويجمعوهم ويدخلوهم في المشكلة
إستدعاء الاهالي للتحكيم في المشاكل الحياتية العادية.... في الغالب بيضر اكتر ما بينفع
تدخل الاهل بيخلي كل حاجة تتقال .. لأن كل واحد عاوز يدافع عن نفسه قصاد الناس ... مع إن في العادي كان ممكن الزوجين يكون عندهم قدرة على التغافل عن بعض التفاصيل
في كلام لما بيتقال قصاد الناس... بيوجع جامد ومش بيتنسي ... وبيخلينا متحفزين دايما ناحية بعض
إستدعاء الأهل كل شوية ... ممكن يخلي الأهالي تشيل من جوز بنتهم او من زوجة إبنهم ... او يخلي الأهالي تشيل من بعض ... وده بيأزم الوضع أكتر
للاسف.. في أهالي كتير مش ناضجة وماعندهاش خبرة في حل الأزمات الزوجية .. ودخولهم في المشاكل بيكون جزء من المشكلة بدل ما يكون جزء من الحل
ده لا يمنع ان في بداية المشوار لو حد محتاج مشورة ممكن يعمل ده بشكل منفرد ...لكن إستدعاء الأهل للتحكيم بشكل متكرر في مواضيع صغيرة ... بيهتك ستر وخصوصية البيت
فنصيحة ... قللوا إستدعاء الأهالي... الا في وضع ماينفعش نكتم على المشكلة أكتر من كده ... وياريت نختار ناس عقلاء وعندهم خبرة وأسوياء بشكل مسبق .. عشان يقدروا فعلا يساعدونا اننا نحل مشاكلنا