في زوج لما بيتخانق مع زوجته ... بيضربها او بيهنها ... ولما يهدى بيكتشف انه غلط غلطة كبيرة ... فيروح يعتذرلها ويبالغ في الإعتذار وممكن يبوس رجلها عشان يسترضيها.
كل ده حلو ... لكن المشكلة لما ده بيتكرر ... بيفتكر ان الإعتذار المتكرر قادر يخليها تنسى وتسامح وتتحمل.
زوجة لما تتخانق مع زوجها ... بتعايره او بتهينه او بتقول كلام ماينفعش يتقال ... ولما تهدى بتحس بغلطتها الكبيرة ... فتعتذرله وتبالغ جدا في الإعتذار.
حلو انها حست بغلطتها واعتذرت.
لكن لما ده بيتكرر تاني وتالت ..بترجع تعتذر تاني وبتحس ان ده كفاية انه يسامح وينسى
لكن الحقيقة ان المبالغة في الاعتذار ... مش دايما كفاية في إزالة أثر الجروح العميقة .
الإهانة والشتيمة والمعايرة والعنف الجسدي ... الخ .. كل دي خطوط حمراء بين الزوجين المفروض لا يتعدوها أبدا .
ولو احنا في خناقتنا لقينا ان ده بيحصل بينا بشكل متكرر .. لازم نقف ونشوف ليه ده بيحصل وازاي ممكن مايتكررش أبدا.
الحقيقة .. ان المجهود المبذول في الحفاظ على عدم تجاوز الخطوط الحمرا أقل كلفة من الطريق اللي بنمشيه عشان نزيل أثر تجاوزها .