في بيوت الزوجين فيها (او احدهما) بيتخانقوا مع بعض بشكل مليان عِند وكبر وتنشيف دماغ ..وخصام بالأيام والاسابيع والشهور ... وبشكل قاسي وبكلمات بتدبح زي السكين ... على مواقف فعلا صغيرة ماتستاهلش كل هذا الحجم من التصعيد
تحس كده في حالة من إستجلاب النكد والحزن والسخط ... رغم ان ربنا رازقهم بمقومات راحة البال المادية والنفسية.
يعني ... بفضل الله اصلا هما في الاساس بينهم حد أدنى من التوافق والحب... صحتهم وصحة ولادهم كويسة ... مستورين ماديا... وهكذا ... ومع ذلك بيتصرفوا أثناء خلافاتهم بشكل طفولي خالي من المسئولية
البيوت دي الناس فيها حجدوا بمقومات راحة البال اللي عندهم و بنعم ربنا عليهم .
وساعتها بيتخاف عليهم انهم يُصابوا بابتلاء حقيقي يخليهم يلفوا حوالين نفسهم فعلا.... وساعتها هايعرفوا انهم كانوا في نعمة و انهم استهلكوا حياتهم ونفسياتهم في حاجات كان ممكن نتغافل عنها ونتجاوزها او نتعامل فيها بشكل أرق وارحم وأكثر تفهما .. وماكانوش ضيعوا كل الوقت اللي ضاع في الزعل والخصام وحرقة الدم وكانوا قضوه في هدوء وسعادة .
فناخد بالنا ... النعمة اللي بتزول ممكن ماترجعش.
احسنوا جوار نعمة ربنا عليكم ... اشكروا ربنا على حياتكم اللي فيه الآف من الناس بيتمنوها ... وماتدوش فرصة للشيطان ينغص عليكم حياتكم ويفرق بينكم .. ولو عندنا مشاكل نسعى لحلها سعي جاد وحقيقي ... ولا تنسوا الفضل بينكم