وانتوا بتتجوزوا .. او بتجوزوا ولادكم .... لازم تحطوا طبيعة النشأة في الحسبان
في مشاكل كتير بتحصل في بيوت الشباب اللي لسه متجوزين قريب... السبب الرئيسي في المشاكل دي هو إختلاف طبيعة النشأة بين الزوج والزوجة
مثلا ... بنت إتربت في بيت الناس فيه حنينيين وعاطفيين جدا ... بيعرفوا يعبروا عن مشاعرهم بشكل كويس من خلال الكلام وغيره...و البنت دي إتجوزت شاب اتربى في بيت عملي جدا الناس فيه لا تجيد التعبير ... فهو لا يجيد التعبير عن مشاعره ولا يهتم بالتفاصيل النفسية في التواصل.... إنتم متخيلين المشاكل اللي ممكن تحصل بينهم بسبب اختلاف طبيعة النشأة؟
كان معايا حالة بين زوجين ... أصل المشكلة بينهم ان الزوجة اتربت في بيت الاب بيساعد الأم في كل تفاصيل البيت ورعاية الاولاد وإيده في إيديها في كل حاجة ... والزوج إتربى في بيت الاب فيه دوره متمحور انه يروح الشغل يجيب فلوس ولا يكاد يكون ليه دور في أي حاجة تانية .. وكانت الأم شايلة مسئولية كل التفاصيل ... فالزوجة منتظرة ان جوزها يعمل زي ما باباها كان بيعمل ... والزوج كان بيحاول يساعدها ورغم انه جاي على نفسه (من وجهة نظره وبناءا على طبيعة نشأته)... الا ان اللي كان بيعمله مش بيرضيها .. فهي طول الوقت شايفاه مقصر ومحمل عليها ... وهو طول الوقت شايفها طلباتها كتير ومش راضية
والمشكلة ان الموضوع مش بيتفهم انه اختلاف في طبيعة النشاة … لكن بيبقى بوابة للدخول في مساحة سوء الظن والقاء الاتهامات
طبيعة النشأة أحد العوامل المؤثرة في تصورنا عن الحياة الزوجية.... فمهم اننا ناخد بالنا من النقطة دي واحنا مقبلين ع الجواز .
** تعديل
صحيح ... مفيش إنسان كامل ... وكلنا فينا عيوب
.. وحتى الحاجات اللي مش عيوب ... الناس مختلفين في الطباع
وكده كده واحنا بنتجوز ... اللي قدامي هايكون فيه عيوب وبعض الاختلافات ... لكن لازم تكون العيوب والاختلافات دي اقدر أتحملها واتعايش معاها... وماتكونش سعادتي مرهونة بتغييرها