منتديات مسك الغلا | al2la.com - عرض مشاركة واحدة

**ahmed 22** · 12-11-22, 01:59 AM


	المشاركة الأصلية كتبت بواسطة إشراق !


	اهلاً بك أحمد .. كنت سـ اعلق في موضوعك لكن تفاجأت باغلاقه ولماذا اغلق ؟ بسبب بعض الردود وعدم اتخاذ الاجراء اللازم ، نحنُ هنا نتحاور ، نُناقش ، ندلي براينا ولكن في حدود الاحترام وعدم التعدي على راي الاخرين او استخدام السيء من الالفاظ او التعابير الخادشة لابد من اناقة الفكر وادب الكلمة .. لامشكلة لدي في تناول اي موضوع ديني ، سياسي ، اقتصادي ، اجتماعي ولكن في حدود الاحترام والمسافات وندرك ان هؤلاء بشر حتى لو كانوا من خلف شاشات لهم الاحترام والاخوة والتقدير كما في واقعنا ،، شكراً لهذه الاضافة ،، تقديري !

والله يا اشراق للأمانة يعني
أنا متحفظ في ردي هنا
عشان انا ماينفعش أكون جزء في أكثر من موضوع اتقفل
واجي اعمل فيها مش من هنا الصراحة ههههه

طيب ..
انا عندي رأي متطرف فيما يخص النقاش
بشكل عام ..

احنا في مجتمع افتراضي مصغر
كل فرد فيه شايف أنه فريد من نوعه ..
ماتفهمش في ايه التفرد ده
بس هو احساس بيتنمي عامة
في اي عالم افتراضي ..

وبالتالي كتير بشكل لا ارادي
شايف أن ليه حق الوصاية علي أفكار الغير ..
لأنه لسا مش مستوعب مسؤلية
الكلمة اللي بيقولها ..
وازاي هي قادرة تغير من أفكار ناس
وهو مش واخد باله ..
في ناس مش مستوعبة
ان بيتعمل لايك لكلامها قبل ما يتقري اساسا
مش مستوعبين حجم التأثير بتاعهم
او عايشين ينمو لامبالاتهم وسط أفكارهم ..
بدون داعي ..

و كتير مننا بيكون رؤيته في اي نقاش جديد
في اللحظة اللي بينطرح فيها الموضوع ..
ومش بيكون عنده ميزان تراكمي ثقافي ..
بيخلي لرؤيته وزن وثقل
وبالتالي مش بيكون منفتح علي أنه يتقبل
شئ عكس كلامه لأنه شايف من خلال
الوقت اللي كون فيه رأيه
انه اخترع الذرة ...
لأن كتير مننا محدثين فكر للأسف يعني

ودليل ده انه نص الوقت بنقضيه
بنتجادل مع بعض في بديهيات اساسا ..
وبالتالي كلامنا صناعة كيبورد مش صناعة دماغ

لأننا لو قاعدين وش لوش كدا ..
الواحد فينا مش هيكمل 30 ثانية اساسا
في أنه يعبر عن وجهة نظره ..
لأنه أصلا مش فاهمها ..
ولا واعي باللي بيحاول يوصله
ولا عارف هو فين من أفكاره ..
وده هو اللي بيصنع الاستفزاز ..

انا بتنمر عليك لأني شايف ببساطة
ان كلنا علي مسطبة واحدة ..
ماحدش قدوة .. مافيش مرجع نستند ليه بثقة
الكل عنده فكرة والكل عاوز يعبر عنها
والكل شايف انه صح .

والكل مشكلته ان الدنيا اتاحت ليه الفرصة
انه عنده منصة قادر فيها
انه بيحاول يبرز الصح اللي
مش مؤمن بيه في الغالب بطريقته
وده بقا مسيطر عليه ...

اهو انا مثلا عمال اهري في كلام
ربما هيتعمل لنصه تخطي
وهيتمسك في كلمتين
هنقعد نجادل فيهم 3 ساعات
ودي المشكلة ..
ان كتير بيتصيد عشان عاوز يبرز
وعاوز يكون لوحة متشافة

حتي اللي شايف نفسه متوازن
بيحاول يخلي توازنه منصة متشافة ..
الا ما رحم ربي
الشو بقا اسلوب حياة