09-30-10, 02:06 PM
|
#4 |
| مهمآ گبرت فبداخلي طفلةٌ مدللـه | | | | | | | | | | | | | | | | | | | | | | | | | | | 
لفصل الثالث عشر:
لمى:هلا ريم..ماتصدقين وش صار لي اليوم.
ريم:اللهم أجعله خير وش فيه وجهك كذا كأن أحد شافط دمك!
لمى:مستحيل أصدق إني سويتها،،أنا تبن،
ريم:تعوذي من إبليس وش فيك؟
لمى وهي تبكي:كلمت مساعد أنا كلمت مساعد،
ريم:مساعد ولد عمك ماغيره ذاك،
لمى:إيه هو مو معقوله إني أنحط بهالموقف بيوم من الأيام،
ريم:إرتاحي وفهميني السالفه؟
(قعدت لمى تسولف لريم السالفه)
ريم: مدري وش أقول أحس إني منصدمه،
لمى:أجل وش أقول عني أنا اللي بغيت أستخف عقب ماصكرت منه،
ريم:شوفي لو تراجعتي ترى بيشك وكذا تخلينه يكسب الموقف،
لمى وهي مقطعه نفسها من الصياح:ليه كذا أنا غبيه وش أبي فيه ليه ياربي؟
ريم:إيه صح وش تبين فيه تدقين عليه مابقى إلا هو؟
لمى:كله بسبة رئيس التحرير الغبي إكتشف تشابه الأسماء بيننا وعرف إنه يقرب لي وترجاني أحاول مع مساعد لأن هذا بيكون سبق صحفي للجريده،
ريم:أها والله إنك إنحطيتي بموقف لاتحسدين عليه،
لمى:أويلاه ياريم يوم كلمته قعدت أنفض وأحس قلبي يدق موب معي،،تخيلي من يوم سمعت صوته والدمعه مافارقتني،
ريم:إنتي تحبينه؟
لمى:مدري بس أول مره يصير لي كذا،،،لا موب معقوله ياريم لازم أرجع لتوازني مستحيل يشوفني بهالمنظر،،ياريم إنتي تعرفيني أنا صكيت على قلبي ومستحيل مساعد أو غيره يرجع يفتحه من جديد،
ريم:صح مو حلوه بحقك عقب اللي سويتيه فيه،
لمى:الله يرحم والديك وش سويت فيه؟
ريم:عموما حاولي تسيطرين
على نفسك ماينفع الضعف باللحظات اللي كذا وخليك رسميه لأبعد الحدود معاه وإنسي أصلا إنه مساعد،
لمى :يارب تسهل اليوم،،ياربييه أحس بتوتر فظيع،،مدري ليش أحس إن هاللقاء بيكون مسخره،
(جاء وقت الموعد وأنا أنتظر على أحر من الجمر،،دق جرس الباب وكنت أبي أنقز أفتح الباب من الوناسه،،بس قلت لا أركد يامساعد،،لازم تسوي برستيج قدام لمى،،هدء اللعب شوي،،وفعلا خليت لمى تنتظرني بالصاله حوالي ربع ساعه وطول الوقت قاعد أطلطل عليها،،بعدين نزلت لها ،،آه مو قادر أوقف على رجولي،،
مساعد:هلا لمى نور البيت،
لمى:شكرا منور بوجودكم.
مساعد شوي مرتبك:أتمنى إنك بخير.
لمى:الحمدالله،،عموما أنا ماأقدر أطول بس خلنا ندخل باللقاء إذا ممكن.
مساعد:مافيه إشكاليه تفضلي.
لمى:ممكن بالبدايه تعرفنا على البطاقه الشخصيه.
مساعد وبضحكه ساخره:إنتي أدري عموما مساعد بن فهد.
لمى:الحاله الإجتماعيه؟
مساعد وبنظرات مربكه:يابنت البدوي لاعشق يموت ولا يموت العشق .
لمى وبنرفزه:عفوا ممكن تجاوب على قد السؤال؟
مساعد:وأنا وش قاعد أسوي ماعطيتيني فرصه أكمل.
(لمى هنا إنحرجت وإعتذرت)
مساعد:الحاله الإجتماعيه أعزب والسبب حلم حلمته بالصيف..بس ماكنت أدري إنه سراب ولازم ألبس نظاره.
(لمى توترت بشكل فظيع لدرجة يدينها بدت تعرق)
لمى:كيف كانت بداياتك في عالم التجاره؟
مساعد وبتهكم:الله يعز غنم أبوي وبعارينه اللي رزتني.
لمى بإبتسامه خفيفه:ماتغيرت يامساعد للحين دمك خفيف.
مساعد:السؤال اللي بعده.
لمى:جاوب اللي قبل أول.
مساعد:عادي بعد ماتوفى الوالد الله يرحمه إستثمرت حلالنا وبس.
لمى وبسرعه:ماهي طموحاتك في مجال عملك؟
مساعد وبضحكه:طموح..عاد تصدقين موب غريبه الكلمه علي.
(لمى مسكينه ودها تقوم تكفخ مساعد): تعرف معناها وألا أعلمك مره ثانيه.
مساعد تنرفز شوي:لا مايحتاج طموحي هو إن أحط بصمه قويه واللي هي إن لهجتي الثقافيه تحاكي لهجتك وخلاص تعديت هالمرحله.
لمى وهي رافعه رأسها وتبي تربك مساعد مثل ماأربكها: شي ندمت عليه في حياتك؟
مساعد وهو مصعوق: مافيه شي أندم عليه.
(قاعد يصرف وهو عارف إن الشي الوحيد اللي راح يندم عليه إنه ماقال لها أحبك)
لمى:حلوه ثقتك.
مساعد وبإندفاع:مايحتاج تمدحيني.
لمى وهي معصبه:شي غير مجرى حياتك؟
مساعد يحاول يسيطر على نفسه:كلمه وحده قلبت الدنيا علي مستحيل أنساها(ماجستير)
لمى فقدت هدؤها:وش قصدك؟
مساعد:أبد سلامتك بس الماجستير له فضل علي.
(لمى بدأت تطلع عن الحوار المنطقي علشان تستفز هالبارد اللي قدامها)
لمى:ماذا يعني الصديق في حياتك؟
مساعد:محمد هو كل معاني الصداقه.
لمى:القلم؟
مساعد:أوه ياما وياما كتبت خواطر فيه.
لمى:الحب؟
مساعد وهو يكابر: ولا شي علاقة مبزره بس يكبرون ينسون كل شي.
لمى قاعده تحاول تسيطرعلى نفسها:أبيات ترددها؟
مساعد:
أي محبه وأي عشره وأي حنان..
وأي شوق اللي انت تتكلم عليه..
يعني واثق ان باقي لك مكان..
وان قلبي يرد لو ترتجيه..
وين شوقك يوم انا احتجته زمان..
وين حبك يوم انا ميت عليه..
رح للي لأجله بعت حبي زمان..
بس لا تنسى تسلملي عليه ..
(يممماه أحس الجو متكهرب بينهم)
لمى وشوي وتكفخ مساعد:حكمتك في الحياه؟
مساعد يبي يحسسها بالذنب:الفرصه اللي ضيعتيها من إيدينك ماأتوقع ترجع مره ثانيه.
(لمى لحظتها عصبت وصكرت الدفتر وطلعت بدون ولا كلمه..أدري زعلتها لكن والله لأراضيها بس أبيها تحس وتتعلم شلون تحترم مشاعري..وأبيها تفهم معنى الحب..آه يالمى والله الحب اللي بقلبي زاد بقوه لك وشوقي وحنيني كل ماله يكبر بس لازم تحسين بغلطتك.)
بعدها ما إتصلت في لمى وقلت مستحيل أدق عليها،،وقعدت يوميا أشتري الجريده أشوف إذا فيه شي إنكتب عن هاللقاء اللي مدري وش لون قايل،،
مر إسبوعين ولمى مالها طاري ولاحس ولاخبر،،
وماأنسى ذاك اليوم بعد مارجعت للبيت جت أختي نوف تركض..
نوف:مساعد مادريت عن آخر خبر؟
مساعد:مانيب فاضي لك إنتي وخشتك ،،إذا قعدت العصر قولي لي،
نوف :كيفك بس تراه عن لمى،
مساعد:عن لمى!
نوف:وش تعطيني؟
مساعد:وجع يوجع ظهر العدو إخلصي تكلمي لأكسرعظامك.
نوف:أوف مستحيل تصدق.
مساعد:لعنبو شيطانك إخلصي مت من الخرعه.
نوف:مطلق ذاك اللي بقريتنا أبو إبراهيم..تخيل راح يملك على لمى الأسبوع الجاي.
مساعد بغى ينصرع من الصدمه: نوف والله لو تكذبين ترى محد يفكك من يديني.
نوف :ليش أكذب لمى بنفسها داقه تعزمني.
الفصل الرابع عشر:
من الفرحة نسيت اني عليك البارحة زعلان..
نسيت اقولك لو تسمح تكرم لا تكلمني..
اهلي بك مثل ما انت تهلي بي وانا الشفقان..
احس اني انا الغلطان وفرصتك ما تعلمني..
ذكرتك انك علي اخطيت ولكن نعمة النسيان..
تنسيني خطا الغالي وترجع له تسلمني..
حبيبتي ما تمكن داخل فؤادي ولا انسان..
الومك يومك انت خطيت واذا اخطيت انا لمني..
حبيبي لو يطول الوقت او يقصر ابد خلان..
((تراك انت الوحيد اللي يشتتني ويلملمني..))
حبيبي دايما قلبي معك مشتاق لك ولهان..
غيابك عن عيوني طول هالمدة يألمني..
لاشعوريا قعدت أركض لغرفتي مثل المجنون...لاموب معقوله هذا شي ماخططت له ولا كنت متوقع يصير..لمى ومطلق مستحيل..وتعبت من كثر ما أفكر وجاني إرهاق وغطيت بالنوم إلى 2 بالليل..
قعدت أفكر وأقول لنفسي يامساعد لازم تسوي شي دق على لمى وقل لها إنك تحبها وتموت فيها..بس وشلون إنت أهنتها...ياربي ليش قاعد يصير لي كذا..وطول الليل وأنا أهذر مع نفسي..
أخيرن قررت ورفعت الجوال وإتصلت عليها.
طوط _طوط_طوط
مساعد:السلام عليكم.
لمى:هلا وعليكم السلام.
مساعد:لمى صحيح بتتزوجين مطلق.
لمى وبتحدي: ليش عندك مانع.
مساعد قاعد يكابر:لا أبد بس دقيت أبارك لك.
لمى:الله يسلمك وعقبالك.
مساعد:مع السلامه.
خلصت المكالمه وأنا ماقدرت أقول شي..يالله هذي هي المره الثانيه اللي دموعي تنزل فيها..
مرت ثلاث أيام وأنا حالتي يرثى لها..لانيب قادر أتكلم ولا حتى أداوم..كنت شبه منهار..آه يامحمد محتاجك بقوه..
وكنت أقول لنفسي يامساعد ماراح ينفعك كبرياءك لاخسرت لمى..لكن وش لون عقب ماأهنتها ..طيب حتى هي أهانتك يعني تعادلت معها..
بعد هواجيس طويله قررت أكلمها..مسكت الجوال وأنا متردد معقوله لمى راح تستسلم بهالسهوله علشان حب..
طوط_طوط_طوط
لمى:نعم
مساعد:هلا لمى كيف الحال؟
لمى:الحمدالله أموري دايم بخير.
مساعد وبتحدي:دايم تحاولين تحسسين الكل إنك بخير وإنتي فيك هموم الدنيا.
لمى:عفوا مساعد أتوقع هذا شي شخصي وأنا ماأحب أحد يتدخل بخصوصياتي.
مساعد وخلاص ماعاد يستحمل: لمى أنا ولد عمك وأبي مصلحتك..مطلق أبد مايناسبك.
لمى :ليش إنت جاي تعلمني من يناسبني.
مساعد:مطلق إنسان متزوج.
لمى وبإصرار:وين المشكله؟
مساعد:مطلق أخر إنسان ممكن يتوافق معك.
لمى:حرام أظلم الرجل وأنا ماعرفته.
مساعد وقد عصب:حرام تظلمين نفسك معاه وتدفنين حلمنا.
لمى:أي حلم آه تقصد سراب الصيف.
مساعد وهوفاقد السيطره على نفسه:لمى مطلق راح يقضي على كل طموحاتك.
لمى وببرود متصنع:ليش أضيع الفرصه مره ثانيه من بين يديني..يمكن يكون مطلق فرصه ماتنعوض وعلى قولة حكمتك الفرصه اللي تضيع من يدين الواحد مستحيل ترجع.
مساعد:لمى بس أنا مازلت مساعد.
لمى:وأنا مازلت لمى.
مساعد:إيه لمى أنا ماضعت وأنا موجود أنتظرك.
لمى:خلاص يامساعد كل واحد خذا حقه وهالحين تعادلنا.
مساعد وبشموخ:يعني تنتقمين مني.
لمى:لا بس مثل ماعيشتني بعذاب ذوق مري.
مساعد:إنتي عارفه من البدايه إني أحبك.
لمى:والنهايه.
مساعد:والنهايه بعد أحبك.
لمى:مساعد وأنا بعد كنت أحبك.
مساعد وحاط يده على قلبه:
وهالحين؟
لمى:هالحين بعدأربع أيام بيجي مطلق يملك.
مساعد بحسره:خلاص ماعاد تبيني؟
لمى:حرام عليك وربي إني أحبك بس اللي أنا سويته غلطه ماأستحق تسامحني عليها،
مساعد وبقلب طايرمن الوناسه:لمى إنسي كل شي راح،،إنسي كل اللي مضى،،وخلينا نفتح صفحه جديده ياأروع ملاك،،
(لمى قعدت تبكي،،ياالله هذي أول مره أسمع لمى تبكي هالإنسانه اللي ماترضى إن أحد يناظرها بشفقه أو يجرح كرامتها قعدت تبكي بشكل رهيب)
مساعد:لمى وش علمك تبكين ترى دموعك غاليه!
لمى وبعد مده من البكاء: آه يامساعد من زمان كان ودي أبكي لكن كل ماتطلع الدمعه رحت أتهاوش معها وأصبر نفسي علشان أواجه كل التحديات،
مساعد:طيب هذا إنتي وصلتي للي تبينه لمى بنت عبدالله إسم من ذهب،
لمى:صحيح بس موب حلو أبد إنك تقفل على مشاعرك وترفض الإحساس،،يامساعد حتى العواطف تجنبت أتكلم عنها علشان ماأعطي نفسي فرصه للإنهيار،
مساعد:لمى إنتي قويه وبنت أصول وقدها وقدود،،يالمى تعجبني جرأتك وكيف إنك تحديتي أقسى الظروف علشان توصلين للي تبين،
لمى:يامساعد ودي أشوفك وأبكي لين مايبقى دموع،
مساعد وهو يحاول يلطف الجو:
ماأصدق إنتي عندك دموع،
لمى:وش قصدك؟
مساعد:لا أبد يالغاليه بس حتى يومك بزر كانت بدور تكفخك وماتصيحين،
لمى: وليش أصيح ضربها عادي مايوجع،
مساعد:هههه لا بالله صدقتك،،وأكبر دليل تجيني تشاهقين مساعد تكفى أفزع لي بدور مصعت شعري لدرجة إن رأسك صار كأنه صلعة بطيخ،
لمى:أفا عاد الله وأكبر من زين سنك المكسوره كأنه دريشة بيتنا القديم،يمماه كلما أتذكر أحس بقشعريره ،
مساعد:لعنبو بليسك بنات القريه كلهم مطيحين مع إبتسامتي الخلابه،
لمى:واضح وبقوه،
مساعد:حركات يعني مسويتلي فيها حبتين،،تذكرين يوم خويلد أبو الضبان،يحط عليك ضب وقعدتي تصارخين كأنك مشفوطه بالكهرب،
لمى وبتنرفز:إلا بغيت اسألك إنت للحين سيقانك مغبره؟
مساعد:موب مهم السيقان أهم شي العقل،
لمى:إخس يامعقلهم،
مساعد:لمى
لمى: سم
مساعد:وربي إني أموت فيك،،خلاص لازم نتزوج،
لمى:مدري بس شوف أبوي؟
مساعد وبسخريه:طيب ومطلق،
لمى:مستحيل أفكر في غيرك،
مساعد وبجديه:لمى إنتي حبيتي مساعد بن فهد وألا مساعد ذاك البدوي
لمى وهي متفاجأه:أسمع أنا حبيت مساعد الشقردي،،الرجل العصامي،،اللي يجسد الرجوله وقلبه كله طيبه إنسان متسامح وحنون،،وأنا يامساعد اسأت الظن وخفت إنك توقف في طريقي بس للأسف كنت غلطانه،،
مساعد:يعني لوبرجع بدوي بتحبيني؟
لمى وبذوق:إسمع يامساعد إنت ما كان ناقص عليك إلا العلم وهذا إنت تحديت كل شي وأثبت إنك تقدر تسوي أشياء كبيره،،وعلى فكره يامساعد العبره بالنهايه موب بالمكان اللي نعيش إحنا فيه بالعكس العبره في العقول اللي تعيش فينا،،
ويكفي يامساعد إني حبيتك حب الذات للذات،
مساعد:طيب ليش قعدتي تكابرين؟
لمى وبصراحتها المعتاده:أنا ماكنت أكابر،،أنا شطبت على كلمة حب من حياتي لأن ماأبي أعلق نفسي بأحد أبي قلبي بين يديني بس إكتشفت إني كنت غلطانه وإن الحب شي موب إختياري،
مساعد:شفتي يالمى كيف الحب يتعب!
لمى:خلاص صك على الموضوع ترى برجع أصيح،
مساعد:لا واللي يرحم والديك إنتي إذا صحتي كأنك حنفية بيتنا إذا إنفجرت،
لمى:الله يسامحك بس يالله سب الحبيب مثل أكل الزبيب،
(لا بالله اللي راحت الأمثله وطي ،،مدري من المتنح اللي درسك عربي يالمى)
مساعد:ههه عموما ياقلبي ماأطول عليك أحس إني تعبان،
لمى وبصمت: أنا قلبك يامساعد؟
مساعد:إنثبري مدري وش تبيني أسوي فيك يالبارده،،عقب كل هالسنين شاكه بهالشي،
لمى:لا تصبح على خير،
الفصل الخامس عشر:
كنت أنتظر الصباح متى يجي علشان أعطي أمي خبر تروح تخطبها من عند عمي عبدالله،،
واللي تمنيته صار عمي وافق،،وتم كل شي تمام بس ياشينها لاجتك مصيبه من أقرب الناس لك،
ترن ،ترن،ترن
مساعد:ألو
محمد:هلا أبو جرح وش العلوم،
مساعد:والله أبد ماناقصني إلا شوفتك يالخايس،
محمد:خلاص تبي تشوف خشتي وتزهق بعد،،تعال لي أنا هالحين بالمطار،
مساعد موب مصدق:قل قسم،
محمد:أصغر عيالك علشان أمزح معك،،تبي تجي وألا أشوف تاكسي،
مساعد:لعيونك أصير تاكسي،،مسافةالطريق وأكون عندك؟
(إتجهت للمطار وأنا ميت حماس وأبي أعطي محمد أخباري،،لا وأكيد يبي يطير من الوناسه إذا درى وش صار لي مع لمى)
مساعد:هلا أبو حميد وش علمك صرت مثلهم،
محمد:لا ماتغير فيني شي بس اللوك قلت لهم أبي زي توم كروز،
مساعد وبضحكه:توم كروز مره وحده،،إنت حدك تصير مثل أبو ملوح جارنا راعي البعارين،
محمد:إلا على سيرة البعارين وش أخبار إختك نوف؟
مساعد وهوميت من الضحك:ليش يعني وش الرابط بينهم؟
محمد:يعني أقصد ماضعفت ؟
مساعد:مدري بس يقولون إنها ذابحتن عمرها بالرجيم،
محمد:إلا خويلد أبو الضبان ماخطبها،
مساعد:يخسي هذاك طاح من عيني من يوم حط صورة هذيك البسه،
محمد:ههه تقصد نانسي،
مساعد:أيوه هي هذي،،إلا تعال وش الطاري تسأل؟
محمد:أبد ماعندي شي بس أتفقد أحوال الرعيه،
مساعد:يالحبيب عندي لك خبر يسوى الدنيا،،خلاص أنا ولموي نبي نتزوج،
محمد وهومصدوم: شلون كذا إنتم من زمان تفرقتم،
(بديت أقول لمحمد كل التفاصيل اللي صارت،،)
محمد:أها يعني هذا اللي صار،
مساعد:أنا أسعد إنسان.
محمد وبعصبيه:معقوله يامساعد نسيت كل اللي سوته فيك لمى؟
مساعد:موب مهم..المهم إننا فتحنا صفحه جديده.
محمد:وش لون موب مهم..الأيام اللي مرت عليك ماكانت سهله..تخلت عنك وإنت في قمة حاجتك لها.
مساعد:خلاص أنا لو بعيش نفسي على الماضي ماكان تغيرت حالتي كان بقيت مساعد البدوي.
محمد:يامساعد الموت أبرك لك من إنك تصافح إنسان جرح كرامتك.
مساعد وبدا الضغط يرتفع عنده:ياابن الأجواد وش جاك؟؟وش الهرج اللي تقول؟؟
محمد:وش تبي فيها؟
مساعد:لعنبو دارك ولا كأنك تدري بشي..ياأخي من يوم طلعت على الدنيا وأنا أحبها..وإنت أكثر واحد تعرف وش كثر صبرت علشانها.
محمد خلاص وده يذبح مساعد:هذي مارجعت ولا عرفت قيمتك إلا يوم صار لك إسم..جايه بعد هالسنين ترز أسمها جنب أسمك.
مساعد:وش بلاك إستلجيت إنت تعرف لمى ماهيب من نوعيةالناس اللي تفكر كذا..وغير كذا هي موب حاجةإسمي.
محمد:وإنت وش دراك عن نوعية تفكيرها؟؟ماذكرتك إلا هالحين وجاي تقول إنها ماتفكر كذا.
مساعد:يامحمد الإنسان اللي نواياه شينه يبين وأنا موب لهدرجه دلخ علشان ماأعرف اللي يحبني لذاتي.
محمد:تبطي يامساعد تعرف اللي مثل نوعية لمى.
مساعد:أقول يامحمد لايكثر وتعوذ من إبليس وتراني أقدر أقولك إنثبر ومالك دخل بحياتي الخاصه..لكن إحترام للصداقه والعشره خليتك تأخذ راحتك تهرج..لكن هالحين إلزم حدودك ياأبو حميد.
محمد:يعني معقوله يامساعد تتزوج صحفيه.
مساعد:وخير ياطير إنشاءالله تشتغل مع المافيا.
محمد:وإنت من جدك ترضى.
مساعد:ليه ماأرضى..ياناس وش فيكم ياأخي ماهيب إنسانه ..مالها إحساس وشعور..علامكم إنجنيتو..
محمد:وش لون بتتحمل الحياه معها..شغلها واجد..ومواعيدها واجد.
مساعد:طيب أنا اللي بتزوجها وأنا راح أتحمل مايجيني بس ريحوني من هالقلق اللي سويتوه.
محمد:وراح تتحمل الناس اللي يحبونها واللي يترصدون لها.
مساعد وبإستغراب:وش قصدك ترى مافهمت؟
محمد:هذي هي حياتهم الصحفيين ياناس تحبهم أو ناس تترصد لهم.
مساعد:والله إني أشوف إن هذي حياة كل إنسان منا وياما نعرف ناس تحبنا وبالمقابل نعرف ناس تغار منا..ياشيخ خل عندك منطق وجب كلام صح ولاتحاول تطلع مبررات مالها داعي...وغير كذا حاول تنسى سالفة وظيفتها وتكلم عن إنها لمى.
((الظاهر مافيه أمل شكل محمد حاقد على الصحافه..)
محمد:طيب لو جاء واحد من هالمعجبين بمقالاتها..وقال والله يالمى أنا معجب في كتاباتك..وقتها يالشقردي وش بتسوي بتصير مثل الحمار ساكت لاغيره ولا دم؟
مساعد وبغضب: إعقب ولا كلمه تفهم لابوك لابو من حط هالأفكار في رأسك..ولو جاها أحد مثل ماقلت لاتنسى يامحمد من هي لمى! لاتنسى إنها إنسانه عندها أصول ومبادئي في حياتها..وبنت رجل ماهوب كل إعجاب تقبله ولا هي كل كلمه تحسب لها حساب..وعلى قولتك لو أحد قال لها كذا هي تعرف كيف تقبل المدح وكيف توقفهم عند حدهم.
محمد يحاول يهدئي النقاش: يامساعد فيه ناس يعرفون يتجاوزون حدودهم معها بطريقه حلوه.
مساعد:وش دعوه يامحمد ليش لمى موب عارفه لأشكال مثل كذا..يامحمد كلنا تربينا في بيت واحد..وأكلنا في صحن واحد..وصدقني يامحمد لمى قبل كل شي إنسانه تخاف رب العالمين.. وغير كذا ماراح تتعدى أصول التربيه لخرابيط..يامحمد هذا أنت رحت لأمريكا ورجعت مثل ماأنت الرجل الشهم ..العاقل والبدوي..وهذي لمى الصحفيه اللي حفرت أسمها من ذهب والكل يشهد إنها أخلاق وذوق..وهذا أنا من أكبر التجار ومازلت مساعد القروي..وش تغير فينا..يامحمد كلنا حليب جدتنا نوير يسري في عروقنا ويسري في دمنا الخير والعفه والطيبه.
محمد والظاهر إن مجتمع الغرب خلاه حذر لدرجه موب طبيعيه:يامساعد بس الوقت هذا موب وقت النيه الطيبه..هذا وقت الإستغلال.
مساعد وهو يحاول يقنع محمد:ليش إنت خايف على لمى..يامحمد إنت تكذب على نفسك..لمى الكل عارفها من يوم كانت صغيره شخصيتها قويه وماترضى الغلط.
محمد وبتحدي:إسمع يامساعد آخر كلمتين وماعندي غيرهم..زواجك في لمى راح يكون نهاية علاقتك فيني وإنت إختار.
( راح محمد وتركني وأنا مصدوم..آه ليش قاعد يصير فيني كذا..ليش وش سويت في دنياي..ليه يامحمد تحطني في هالموقف المحرج..أختار من فيهم.
محمد صديقي وخوي الدرب..أنا وإياه عشرة عمر..إحنا أكثر من أخوان وماأبالغ لوقلت هو نصفي الثاني..ياكثر ماوقف معي وقفات ماينساها إلا قليل الأصل..محمد هو مساعد..ومساعد هو محمد..إذا شافوني عرفوا إن محمد حولي..كنا مانفترق إلا وقت النوم..محمد هو دوا روحي وبلسم جروحي..الصديق اللي مابقى لي من دنياي إلا هو..آه ليش يامحمد تحطني في هالموقف..حرام عليك يامحمد وإنت تدري إن قلبي متعلق في لمى..وقعدت أربع أيام حالتي يرثى لها..كرهت حياتي وياليتني ماعرفت أحد بدنياي
قعدت على هالحال بس أفكر بالحل وأخيرن قررت أتصل في لمى وأعتذر لها..
مساعد:هلا لموي.
لمى:هلا ياقلبي وش فيك ماترد أشغلتني عليك.
مساعد وبصوت مخنوق:إعذريني يالحبيبه والله إنشغلت.
لمى:على الأقل مسج تعطيني خبر إنك مشغول.
مساعد والدنيا صاكه في وجهه:لموي ودي أقول لك شي.
لمى:سم.
مساعد:لكن أتمنى اللي بقوله مايضايقك.
لمى وبهدؤ:إنت عارفني وعارف شلون أفكر ف ليش ممكن أتضايق.
مساعد:محمد صديقي.
لمى:أبو حميد ياحبي له الله يامحلاك ياذكرياتنا..هو للحين ملقوف.
مساعد:إيه وبعد نذل.
لمى:عفوا وش قلت.
مساعد:لا أبد سلامتك..بس أقولك هو توه واصل من أمريكا ومتحمس وجايب مشاريع وأفكار.
لمى: مره حلو..يعني إستفاد من هالسفره.
مساعد والأخلاق قافله معه:والله ماالظاهر..عموما اللي بغيت أقوله إن الفتره الجايه ورانا مشاريع وودي أدعم حمودي..علشان كذا لو ماعندك مانع نأجل الملكه ثلاث شهور..لومايضايقك.
لمى:أوف يامساعد.
مساعد وكأن أحد معطيه طراق:ليش زعلتي.
لمى:وش دعوه كل ضيقة الخلق علشان الملكه..بالعكس خذ راحتك ولاتضغط على نفسك وأنا ماعندي مانع لو تبيني أنتظر العمر كله.
مساعد والإبتسامه شاقه الوجه:يابعدهم هذا العشم فيك..طول عمري أعرفك شقرديه.
لمى:عموما هي فرصه حلوه إني أضبط أموري.
مساعد:روحي تفداك يالغاليه.
لمى:
((صوتك يداوي عله القلب والروح..))
أرجوك لاتقطع دوا الروح عني..
$$$أموت أنا بصوتن جمع جد و مزوح$$$ ..
لا من سمعته قمت أرحب وأغني...
فديت من خلا حياتي لها روح..
فديت من حبه غزاني وفتني..
مساعد:......................
لمى: :......................
(الخايس مساعد سوى تشفير لبقيةالمكالمه الظاهر كلام طالع من قلب) |
|
|
|