(( بيت ابو فيصل ))
( الساعة 4 العصر )
دخلت نسايم تقوم فيصل عشان يتغدى ..
نسايم : فيصل .. فيصل
فيصل الي كان نايم فتح عيونه : ها..؟
نسايم : قول يللا الغدا ... بسك نوم
قام فيصل وقعد على السرير يفرك عيونه لين ما فتحهم زين : كم الساعة ؟؟
نسايم ابتسمت : الساعة 4 .. قوم ما بقى شي ويأذن المغرب .. الحق على العصر
فز فيصل بسرعة وراح الحمام يتوضا عشان يلحق على الصلاة ..
ونسايم طلعت من الغرفة عشان تحط الاكل لاولادها ..
وبعد 10 دقايق طلع فيصل من الغرفة .. وشاف الكل قاعد على السفرة .. نسايم زوجة ابوه .. وشوق اخته الصغيرة اللي عمرها 3 سنين وامل اللي عمرها سنة ونص في حضن امها ..
ومع هالمنظر تذكر فيصل كلام نايم امس بالليل ... وابتسم ..
فيصل : وش هاللمة الحلوة ... ؟؟
قعد جنب اخته شوق : فديت شوااقي الحلوة انا .. شخبارك...؟
شوق تبتسم ببراءة : طيبة ..
باسها فيصل على خدها وقال : تروحين معاي اليوم
شوق : وين ..؟
فيصل وكانه بزر : مفاااااااجأة ...!!!
شوق : أي ارووح ..
فيصل : زين يللا تغدي عشان اطلعك ..
وجه فيصل نظره على نسايم اللي كانت تطالعه بفخر وابتسامة حنية وكانها تشكره لانه طيب خاطر البنت بكلمتين ..
فيصل : شفيك ..؟
نسايم : ولا شي .. يللا كل ..
فيصل : وين زوجك.؟
نسايم : قال انه بيتغدى مع واحد من ربعه اليوم ..
ما اهتم يصل بالموضوع وقعد ياكل ...
وبعد الغدا .. اخذ اخته الصغيرة شوق .. وطلع يوديها يتمشون شوي ..
ف السيارة ...
فيصل " اول مرة احس بهالشعور .. شعور انه عندي اخت احن عليها وادلعها .. بدون حزازيات .. لاني كنت دايم اعتبر لينا اختي .. بس .. بعد مو زي اختي الحقيقية لانه لينا بنت .. وانا ولد .. واحنا صرنا كبار .. عشان كذا بيننا حواجز العيب وما عيب والسوالف هذي .. "
طالع في اخته اللي كانت لازقة بالدريشة تطالع الناس برى وكل ما تشوف شي تقعد تطلع اصوات تضحك او تسال فيصل عنها .. وكانها ولا عمرها طلعت من البيت ..
شوق : فيثل .. فيثل ايش هذاك ...؟
ابتسم فيصل : هذي شاحنة ..
شوق : ينامون فيها ..؟؟
فيصل ضحك على برائتها : ههههه لا ما ينامون
شوق : اجل ايش ..؟
فيصل : ينقلون فيها الاغراض الكبيرة زي التلفزيون والكنب ..
ابتسمت شوق ..
فيصل : وش فيك تضحكين ..؟
شوق : مافي شي
فيصل " غريبين الاطفال .. على أي شي يضحكون .. ماهمهم شي بهالدنيا غير الضحك .. نيتهم بريئة مرة .. يا حظهم ..!! "
___________________________________
(( البحرين .. الساعة 5 المغرب ))
( على السفينة )
طالعت البحر .. خاطرها ترمي نفسها فيه وتنتهي من هالحياة والعيشة والدنيا كلها .. زهقت من كل شي .. كل شي ف دنيتها يجيب لها المشاكل .. وين ما لفت وجهها تحصل مشكلة ...
تنهدت دلع بتعب ..
لينا : وش فيك دلع ..؟؟ مو على بعضك من جيتي ..
دلع انتبهت : ها ..؟؟ لا بس .. سرحت شوي ..
لينا : علي ..؟ قوليلي وش فيك ..؟
دلع لفت وجهها الجهة الثانية .. خايفة أي دمعة خاينة تخدعها وتنزل : ما فيني شي .. تذكرت امي وابوي .. تذكرت حياتي اول .. شلون كانت وشلون صارت .. تذكت كل شي حزين صار لي بالحياة ...
لينا : كل هذا من البحر ..؟
دلع : أي والله .. البحر يخلي الواحد يطلع كل الهموم اللي بقلبه ولو كانت جبال من الهموم .. حتى لو هموم نسيناها ومحاها الزمن .. اول ما تشوفين الموج الازرق ترجع الذكريات ..
لينا : أي والله صدقتي ..
قرب سعود ووقف جنب دلع .. بس هي ما حست عليه لانه كانت تكلم لينا وملتفتة لها..
دلع : الواحد غصبا عنه .. حتى لو حاول يكتهم الهم والمشكلة .. اول ما يشوف البحر .. تفضحه مشاعره .. يبدا كل شي يطلع منه .. هم ورى هم .. مشكلة ورى مشكلة .. كل شي يطلع ويحس الواحد براحة كبيرة
لينا تتامل ف كلام دلع وحاسة انه دلع من داخل تتعذب .. او فيها شي مكدرها .. المهم انها مو دلع الطبيعي اللي تعرفها ..
دلع : الانسان حتى لو كان يظهر انه فرحان .. لازم يكون فداخله احزن .. مافي انسان فرحان كل حياته .. كل الناس فيها الحزن وفيها الفرح .. العبرة بالطريقة اللي يتعاملون فيها مع الحزن .. في ناس تحصلينهم يائسين وطايحين ف المستشفيات من الاكتئاب والضيق النفسي .. وفي ناس هموم الدنيا على ظهورهم وتشوفين الابتسامة ما تفارق وجههم والناس حولهم يساندونهم ..
تكلم سعود وتدخل يوم شاف انه دلع بدت تخورها وتطلع اللي بقلبها : وفي ناس متأثرين بكلام القصص والروايات ..
نقزت دلع من الخوف ووخرت شوي عنه وولبست النظارة الشمسية حقتها ورجعت تطالع البحر ..
لينا : حرام عليك شوف شلون خرعت البنت ....!!! شوي شوي ..
سعود : ما سويت لها شي .. هي تتخرع بسرعة ..
سكتوا الثلاثة وقعدوا يطالعون البحر وهم متسندين على السور حق السفينة .. كلن يفكر بهمومه ..
لينا : اقول ما لاحظتوا شي .. ابوي وامي مو طبيعيين ..
سعود تنهد بضيق : تلاقينهم كالعادة متهاوشين ..
دلع : ......... لا تعليق ..
لينا بقهر : انا ابغى اعرف هالاثنين ليش تزوجوا دام مايحبون بعض .. كله مشاكل مشاكل .. واحنا اللي نضيع بينهم ..
سعود : نصيبهم عاد .. وش بتسوين .. الله كتبلهم كذا .. لازم الواحد يمر بالمشاكل زي ما تقول دلع .. مافي انسان مرتاح ..
عطى سعود دلع نظرة بس هي تجاهلتها وتمت تناظر البحر ..
فجاة جا صوت ديمة من بعيد : لينااااااااااا ... لينا الحقي ..
لينا : شفيك ..؟
ديمة : تعالي بسرعة شوفي الدلفين
طارت لينا تشوف الدلفين .. وتركت سعود ودلع متسندين ويتاملون في كل شي ومن داخلهم يفكرون بحل مشكلتهم اللي انحطوا فيها ..
سعود بدون ما يلتفت : دلع
دلع : ولا كلمة .. تكفى سعود ما ابغى اكلمك خليني هادية كذا .. ترى زين مني متحملة وماسكة عمري .. تكفى لاتزيد وتضغط علي .. ترى والله ما اقدر اتحمل اكثر من كذا .. انفجر والله انفجر ..
تنهد سعود وقال : دلع .. انا ابغى اكلمك .. الموضوع ما يتاجل ..
دلع بتصميم : يتاجل .. انت قلت ناجل الموضوع وانا باجله .. لا تجي الحين وتقول لي خلينا نتناقش فيه .. لاني ما اقدر اتحمل كل هالاحداث مرة وحدة .. حرام عليك تراني انسان والله انسان .. !!!
لفت وجهها الجهة الثانية ونزلت دمعتها اللي كانت خايفة دلع منها .. بس مسحتها بسرعة وحاولت تتناسى الموضوع ع الاقل كم ساعة لين ما يرجعون بالليل الشرقية وتدخل غرفتها .. وتحس انه محد معاها .. وساعتها بتطلع كل اللي ف قلبها ..