اقتباس : من رسالة في التقييم ..
( هذي التدوينه الي اخترت فيها الددسن بدل الحسناء يبغالها جلسة في استراحة نتناقش معك فيها .. ما كل هذا الحب للددسن يارجل .. هل عند صديقنا بنادول علم بهذا الاختيار ؟ اشرح لنا ليش ليش فضلت الددسن على المزيونه ليش ههههه )
بيني وبينك مدري وش السبب ...ولكن من يوم الدنيا دنيا وأنا أُفضّل فئة ( الغرفتين والحوش ) أقصد ( الونيت الغمارتين ..الهلكس وبعده الددسن )..أفضلها على كل رغباتي من ملذات الدنيا ...
وزي ماقلت قبل قليل مدري وش السبب ..هي جت معي كذا ...
المهم راح أفضفض معك شوية :
مرة من المرات اشتريت هلكس غمارتين...المهم بعد ما اشتريتها بقيت معي فترة .. ثم بعدين بعتها .....واشتريت سيارة من فئة السيدان ...لكن ندمت ندم ما أقدر أوصفه مهما حاولت وصفه ....
يارجل نفسيتي تبهذلت واندمرت بسبب شدة ندمي وشوقي لها ....لدرجة ان نفسيتي أصبحت منسدة عن الأكل ..ويوم آكل ما أحس للأكل طعم ...فعلًا ما أحس له لذة ...فقط آكل عشان أكسب شوية طاقة تشيل جثتي .....
والشي اللي ماتوقعته نهائيًّا ... هو اني مرة من المرات كنت ماشي في الشارع بسيارتي السيدان ...لكن فجأة مرت من قدامي سيارتي الأولى ( الهلكس ) ...وطبعًا أعرفها تمام المعرفة وتأكدت انها هي برقم لوحتها ....!!...
المهم يوم شفتها ماتصدق قد إيش تجدد الألم والشوق والندم اللي بداخلي .....لدرجة اني صديت عنها ..ماقدرت أتحمل ..!!...كأني شايف قدامي آدمي بـ يموت ....
طبعًا رؤيتي لها في الشارع ..هي آخر نظرة لها ....وبعدها ماشفتها ولا أدري هل راحت تشليح ولا وين ديارها ..
لكن أنا الآن أكلمك عنها وصورتها قدامي في ذهني ..لأن آخر نظرة لها في الشارع هي اللي رسخت في راسي .....
المهم ماقدرت أصبر على الوضع اللي أنا فيه ...لأني فعلًا تعبت ........فـ ما كان مني إلا بيع السيارة اللي معي ....بعد ماوجدت هلكس تشبه الأولى ...واشتريتها بدون تردد ...
طبعًا اشتريتها مستعملة ومصدومة وجهيتها بالكامل ...لأن فلوسي اللي معي ماتجيبلي سيارة أفضل منها ....
لكن قَبِلْتَها بالرغم من العيوب القوية اللي فيها ...بس عشان أنسى الأولى.. وبرضه لأنها نفس الفئة ........
خلاصة كلامي :
عشق فئة ( الغرفتين والحوش ) أعتبره ابتلاء .....ومايعرفه إلا اللي حصله الشي هذا ...
لو مزايين البنات يصفون طابور قدامي...وبينهم الهلكس ..راح أسحبها من بينهم وأنا مغمض ...وإذا قلت غير هذا الكلام فأنا كذاب ....
.....