..







صباحكم طاعات

صلوا وسلموا على الحبيب المصطفى اللهم صل وسلم عليه

ندخل بالموضوع مباشره

شفت موضوع الشامخه في قسم مشكلتي

تقول متقدم لها شخص ملتزم وعصبي وما يخبي شي عن أمه

هو فيه نقطتين خطيره جدا ولازم نحط تحتها ألف خط باللون الأحمر كمان

عصبي وما يخبي شي عن أمه

اولا الكارثه الكبرى لو كان بمعنى الكلمه ما يخفي شي عن أمه

أظن كلنا ندري ان البنت او الرجل اذا تزوجوا وخرجوا من بيوت أهاليهم وانتقلوا الى بيت الزوجية

خلاص هنا حياتهم خاصه ما ينفع كل شي ينقال للأهل كلامي عن الجنسين سواء البنت او الرجال

اذا كان فعلا كل شي يقوله لأمه بمعنى الكلمه غالبا راح تكون الحياه كارثيه وفيها مشاكل كثيره

معروف ان الأهل اذا تدخلوا في حياة بنتهم او ولدهم المتزوجين تصير مشاكل كثير وفيه حالات وصلت للطلاق

ثانيا عصبي الى أي درجه ؟ يعني أقصى درجات العصبيه عنده ايش ؟

تلفظ او سب او يمكن توصل يمد يده ولا كيف ؟؟

وفيه فئه من الناس أخلاقهم سيئه ودايم واصله معهم بحجة أنهم عصبيين

لو كان كمان من ضمن الأمثله اللي ذكرتها فوق سواء يسب او يشتم او يضرب مصيبه والله

فيه شخص عصبي بس يعصب على شي يسوى ومهما عصب يمسك أعصابه بمعنى ما يضر احد لا يشتم ولا يهين ولا يضرب

وفيه سيئ الخُلق اللي ما يخلي أهل بيته في حالهم ويكبر كل صغيره وكبيره ومنكد على كل اللي حوله بحجة انه عصبي

كل حاله تفرق عن الثانيه ولازم التأكد من النقطتين هاذي لأنهم حساسات مره ومهمات

وعلى أنه ملتزم الإلتزام شي كويس بس مو كل ملتزم اخلاقه حلوه ولا كل ملتزم يعرف يراعي بنت الناس

لحد يجي مدرعم ويقول اني انتقد الإلتزام والدين لا

المقصود شفنا في الحياه كثير نماذج يقولك فلان ملتزم ولما تشوف اخلاقه وتعامله مع أهل بيته تتسائل وين الالتزام؟

اهم شي في الرجال دينه صحيح صلاته واخلاقه لا تقل أهميه عن صلاته الاثنين برضو في نفس المرتبه

هي مواضيع الخطوبه والزواج تخوف للأمانه خصوصا للبنات

يا كثر اللي يمدحونهم ويثنون عليهم ويطلعون العكس تماما

استخيري يا الشامخه واسألي مره ومرتين وثلاثه وعشره وخذي وقتك

والأهم لا تخلين اراء الناس تأثر عليك لو كنتي مو مقتنعه ارفضي

اعرف عقليات المجتمع اللي ترفض يحسسونها انه اخر واحد بالكوكب خلاص

أهم شي قناعتك انتي لأنه حياتك مو حياتهم محد بيعيش مكانك

والله يكتب لك الخير وللجميع يارب










..