فكرة الأنغلاق بصفة عامة مش كتير من الناس تقدر تعملها
في ناس ممكن تقابلك ومن اول كلمتين في حوار بينكم ممكن تحكيلك قصة حياتها كلها من يوم ما اتولدت وتلاقي نفسك في ثانية انت عندها الأخ الذي لم تلده أمه
.... هي الناس دي كده . طبعها كده .... وفي ناس مهما حاولت تفتح بينك وبينها حوار مستحيل حتطلع منها باي حاجة عن حياتها وكل كلامها حيكون هامشي جدا ومحدود .. الناس دي بتعرف ازاي تقولك لحد هنا وستوب.. لا تتعدي هذا الخط حتي لو كان الخط الأبيض مش أحمر ... الموضوع كله بيتوقف علي قدرات وطباع الشخص ونسبة ارتياحة لك من عدمه
محيط الشغل مثلا ... انت بتقعد فيه اكبر وقت في يومك مقارنتة بباقي ساعات اليوم المقسم بين النوم والأهل والأصدقاء .. ف بالتالي بتتكون ألفه بينك وبين زملاء العمل .. بحكم السنين اللي جمعتكم سوا في مكان واحد متشاركين مع بعض أحداث ومناسبات قد تكون سعيدة أو حزينة وكمان بيجمع بينكم فطار يومي اغلب الأيام يعني واكلين سوا عيش وملح
تخيل لو في يوم انت رحت الشغل وانت متضايق لسبب ما وحد من باب الإخوة سألك عن سبب ضيقتك .. بغض النظر عن السبب ده ايه .. مادي أو أجتماعي أو أو أو
هنا في حد ممكن يرد رد عام ( والله الحمد لله علي كل شيء الحياة مبتخلاش واحنا افضل من غيرنا شاكر جدا لك )
وواحد تاني هو أساسا محتاج انه يفضفض وما صدق أن حد قاله مالك ف بالتالي حيرد باستفاضة اكتر ويحكيلك أسباب مشكلتة وممكن تفضلوا سوا لحد ما تلاقوا لها حل
الخلاصة
الموضوع مش بالورقة والقلم ولا تقدر تحكمة إلا إذا كنت انت نفسك شخصية انطوائية بطبعك والكل عارف عنك كده ف بالتالي محدش اساسا حيفتح معاك اي حوار تجنباً للأحراج
تحياتي لك
