لها في داخل الخافق مكانه
أبد مانالها أحد(ن) سواها

لك الله هالمشاعر ذي أمانه
ترفق بالذي لجلك هداها

عطيتك قلب صادق في حنانه
وروحك يالغلا هاتي شقاها

وشعري قد تفرد في بيانه
ويروي ناس عطشى من ضماها

ترى الايام مافيها ضمانه
ولا أحد(ن)يرتجي منها عطاها

يشوف الأجودي منها الإهانه
ومقام أهل الردى عالي سماها

ومَحّد بيموت إلا في أوانه
لجل ذلك تهنى في رُباها

لنا الرحمن يدخلنا جنانه
ويكفينا من الدنيا أذاها