 |  | |  |
| عندي صديق اسمه " خالد "..
من كثر إدمانه للقهوة صاروا يعرفونه أصحاب المقاهي..
يسلمون عليه ويحلفون " هالمرة على حسابي"..
عشرة عمر معهم !!
أنا جاني شعور بالنقص,,
يعزمونك وانا لا.!
قال لي الرجال مخابر ماهي مناظر..
قلت خالد: أنت شايف وجه اللي عزمك؟؟
والله ما اجيبه بالحي فما بالك بالبيت..
قال المهم عزيمة.!
خالد من يومه يمووووت على العزايم..
ما يمديك تقول عازمك على .... إلا وتلقاه راكب جنبك : يلا مشينا.!
المهم,, خالد قرر بين يوم وليلة يخطب..
أنا ما ادري وش ذنب اللي وافقت عليه عشان يخطبها..
لكن هي أقدار ونصيب.!
خالد قبل الزواج كان عند باب بيتي 24 ساعة..
حتى في وقت خروجي للصلاة ألقاه بوجهي.!
بيني وبين ربي يدخل.!
ما بعد الخطوبة برضه نفس الوضع!!
على بالك باقول سحب علي ؟؟
يا ليت والله..
أقول له يا ابن الحلال تعوذ من ابليس..
كلم المسكينة تواصلوا تعرف عليها..
ترا احلى أيام الواحد هي فترة الخطوبة..
يقول لي أنت أهم..
طبعا يقولها ونص كوب الـ v60 مغطي وجهه..
خالد ومن هو على شاكلته..
إذا ربي بلاك فيهم بحياتك..
لا تفرط فيهم ولا تخسرهم.!
هو صح نشبة لكن وفي ويعزك من جد..
طبعا أنا كتبت الكلام هذا هنا..
عشان ما يشوفني خالد أمدحه..
لأنه متعود على تعنيفي وهو لا حياة لمن تنادي.!
فتخيل لو قرأ كلامي هذا وشافني أثني عليه وش بيسوي؟؟
لا تفكر.!
أنا باقول لك.!
خالد: أنت تمدحني ؟؟؟
هذي فيها علوم قبايل.!
والله لاعزمك في كوفي توووه فاتح أنت أول زبون.!
وتستمر المعاناة مع الكافايين!! | |
 | |  |
على طاري الكافايين..
أنا ما عدت أنام مثل قبل.!
فضفضفت لواحد لا يقل سوءًا عن خالد..
فجاوبني إجابة ما احد يبيها وقال : العمر له دور.!
عطيته نظرة وقلت : يا ابوي تراك اكبر مني.!
أنت لو متزوج وانت بعمري كان ولدك يفتح لي الباب..
قلت له بسبب قهوة خالد..
نطلع كوفي نحتسي من الـ v60 ما شاء الله لنا..
ثم نطلع لمحل شاهي بجنبه..
ثم نرجع كوفي غير الأول..
طبعا ما بين كومة الكافايين هذي سوالف خالد اللي الكافايين على مرارته أحلى منها.!
طبعًا هذا الشخص برضه صديق خالد..
فما آخذ شهاداتهم اثنينهم كلهم..
لو بيحكمون علي قصاص..