منتديات مسك الغلا | al2la.com - عرض مشاركة واحدة

**وارف** · 03-13-23, 11:14 PM

طير ياطير تكفى تكسب الأجر فيّا
خذ وداعه وسلم لي على أهل العليّا

قلهم لي وليف(ن) بينهم سم حالي
من سنه صد عني دون ذنب وخطيا

قلهم لا يعيّشني حياة الشقاوي
يكفي اللي قضيته من حياتي شقيّا

قلهم حالتي من عقب فرقاه حاله
بين هالناس لا ميّت ولاني بحيّا

اسهر الليل وعيوني تهل العباير
حسبي الله وانا اللي كان دمعي عصيّا

خيّم الحزن عقبه في مسالك حياتي
والفرح منتبذ عني مكان ٍ قصيّا

صرت خايف مع الايام مااقدر اطوله
كود لا طالت ايديني نجوم الثريا

قلهم صاحبي لا مادرى عن غلاته
يشهد الله غلاته من غلا امي وبيّا

قلهم كان وانه في غيابه نساني
مانسيته ولو فكرت تبّت يديّا

آآآهـ لو كان لأهل العشق قاضي عداله
كان ماشفتهم عند المناهل ضميا