أمنياتي في مرحلة الطفولة
أصير معلمة أو مربية أطفال
و دكتورة و مصممة أزياء
كنت دايماً أعيش هالأدوار لما ألعب مع نفسي

وكنت أتمنى أعيش في بيت فوق الغيوم
وتكون عندي طيارة خاصة وأقودها بنفسي
> لازم الطيارة عشان أوصل لبيتي اللي فوق الغيوم هههه


ولما دخلت المدرسة

كنت أتمنى أصير رسامة
كنت ما أحب الدراسة ولا المدرسة
بس أحب حصة الفنية وأتحمس لها أكثر شي وحصة الأحياء
ولما نروح المختبر ونسوي تجارب وكذا

وكانت عندنا معلمة فنية دايماً تحكي لنا قصتها
وكيف صارت رسامة
رسمها كان يعجبني ومُبهر بصراحة
وولا مرة شفت حد مثلها طوال مسيرتي الدراسية

بس للأسف كانت معلمة الرياضيات تاخذنا من حصة الفنية مرات
وصرت أكره مادة الرياضيات ومن قبل أكرهها أصلاً


وفي آخر سنة دراسية لاحظت عندي ميول واهتمام
بعلم النفس والتحقيق والمحاماة وهالمواضيع
وصرت أهتم بهذي المواضيع وأتمنى أعرف عنها أكثر

وصرت أبحث وأحاول أتعلم أشياء
بس بعدي أحس معلوماتي بسيطة

بس أفرح إذا حد قالي كأنك محققة أو دكتورة نفسية
وبعد خواتي دايماً يقولون لي أنتِ المحامية لأني أحب أدافع

ومن سنوات قليلة اكتشفت أني أحب القصص والروايات
ومن قبل كنت أحبها لكن ما كنت مركزة على نفسي ومنتبهة ل هالشي

والحين أبي أصير كاتبة قصص وروايات

وبعد أبي أصير بزنس وومن
أحسه شي حلوو
وحتى ملابس البزنس وومن الرسمية تعجبني
> تعجبني أكثر من الفساتين

ولا مرة كتبت رواية ولا قصة
وحتى ما أعرف شي عن البزنس وكذا
لكن عادي يمكن يصير من يدري

وأكثر شي أتمناه الحين أصير أكثر وعياً وتزيد معرفتي
وأوصل ل درجة عالية من الفهم والتعمق ف الحياة > يعني أصير حكيمة

وأتمنى أكتشف أو أخترع شي مفيد

وفي أمنيات بعد لكن بخليها سر بيني وبين نفسي
لكن هي أشياء مو دنيوية ولا مادية


وبس هذي آخر أمنياتي
وشكراً.