وانا صغيرة كثير كنت اتمنى اصير رسامة
ورسمت كثير كثير
ع الجدران ع الكتب ع الدفاتر
كنت ارسم لصديقاتي الخرائط
ومهرجانات المدرسة
وكانت لكل صف لوحة يسووها فيها مقالات وكذا
مع مجسمات او اي شكل
وكنت دايما ضمن الفريق المشارك
طبعا محد يعرف من اهلي
محد كان حتى يشاركني ههه
مدري ما كنت احب اكلم حد يشاركني
رغم انه عندنا مسموح تجيبي اي حد
كرامتي كانت حية وقتها
الان اظنها انتحرت من كم سنة ههههههه
كبرت شوي وتفرغت للدراسة
كنت من كثر ما كنت ادرس يجي يوم الأمتحان بس امرر نظري ع الدروس تمرير
وخلاص تجي علامتي كاملة
وحلمت اني اتخصص بطب العيون
ومرة بحرب ابين ب ٢٠١١ اظن
شفت فيديو عيال الجيران يشوفوه
لواحد يذبحوه وبعدها او قبلها بكم يوم شفت
اعدام جماعة بكوكو حرام اظن كذا اسمها
من ذيك المرة صابتني صدمة لأسبوع ما اعرف ليلي من نهاري
وخلاص بطلت سيرة الدم والخ
المهم قلت ي بنت انتي تحبي التاريخ
وتحفظي الارقام وتحفظي الأحداث وعندك تحليل منطقي وتعرفي عن القبايل وتحبي تسمعي القصص من ابوك والناس الكبار
خليكي بالتاريخ وتخصصي فيه وتوكلي
بعدها جاء عريس الغفلة كما يقولون
وحفرت لأحلامي حفرة وحرقتهن
ودفاتر رسمي طيرتهن امي اظن اختي ام لسان فعلتها بس كذبت
ع كلا حاليا حلمي
يكبروا اولادي وهم بعافيتهم
واحاول بإذن الله اوفر فرص حياة احلى من الي حصلت عليها
كمان انكد ع زوجي
النكد شي جميل يخلي الحياة تحلى وكذا
امزح
ع كلا ذا بس
واصلي واصوم واكلم امي واشرب شاي وانام ملأ اجفاني
وخلاص ذي لو مرت بيومي فأنا اسعد انسانة ع الإطلاق
والحمدلله انا سعيدة جدا
غصبا عني سعيدة
وسلامتك