مرحباً بالجميع
في الحقيقه في أسباب كتير جدااا للجريمة لكن كلنا حنتفق علي جملة واحدة
( أن مهما كانت الأسباب ف لا مبرر لها ) _ في أي مجتمع حتلاقي الجريمة مختلفة باختلاف طبقات المجتمع
مثلاً عندك الطبقة المتوسطة والأقل من المتوسطة
السبب الرئيسي هو ضغوط الحياة ... خلافات زوجية علي مصروف البيت
تخيلي عندك أسرة ومش قادرة تأمني لهم قوت يومهم خاصةً في عز الغلاء اللي إحنا عايشين فيه . الأب مطلوب منه مليون حاجة أول كل شهر ومع هذا مرتبة لا يكفي
بيدخل في دائرة اكتئاب وممكن يوصل للحظة ذهاب عقل ويقوم يقتل أسرتة كلها
علي عكس بعض من أصحاب الطبقة الهاي كلاس
حتلاقي السبب الرئيسي هو كثرة الفلوس في أيد الشباب وأن أهاليهم مدلعينهم سواء بنات أو شباب
خروج وسفر وسهر ومخدرات
ممكن واحد بيتخانق مع واحد علشان بيتنافسوا علي بنت والخناقة تطورت وقتله
أو قاعدين في قاعدة مزاج وبيهزروا والهزار قلب جد وهوب واحد سقط
وغيره وغيره ....
^ ومع هذا في ناس أفاضل جدا ومربين أولادهم كويس جداا من أصحاب هذة الطبقة
بس مع الاسف بسبب كثرة السيء الكويس مش بيبان _ موضوع جرائم القتل تحديدا بقي زايد جدا الفترة الأخيرة والواحد خلاص مبقاش يستغرب
أي حاجة بيسمعها وحنستغرب ليه مادام وصلنا ان
أم بتقتل عيالها
بنت تقتل امها
زوج بيقتل مراتة ويحط عليها مادة حارقة ويدفنها
واللي قطع راس صاحبه ومشي بيها في الشارع
وغيرة وغيرة
_ ده غير حالات الأغتصاب والخطف والسرقة بالإكراه
والدولة ما شاء الله عليها ايدك منها والأرض
ده يا مؤمنة عندنا قضية كانت قضية لواحد اسمع راجح لو سمعتي عنه كانت من حوالي ثلاث سنين
راجح ده كان بيبلطج علي بنت وهي ماشية في الشارع وكان في شاب ف الشارع شاف الموقف ودافع عنها
راجح ده عنده ١٧ سنة ونص وقتل الشاب اللي كان بيدافع عن البنت
تخيلي أنه القانون تعامل معاه علي أنه حدث لانه تحت سن ١٨
يعني الدولة عندنا بتصدر البطاقات الشخصية عند سن ١٦ يعني انت بالنسبة للدولة راجل
لو وقفت في كمين وقالولك فين بطاقتك وقولتهم مش معايا وانت فوق ١٦ ممكن يتعمل لك قضية
لكن في القتل مادام انت تحت ١٨ سنة اذا انت عيل غير مسؤل عن تصرفاتك
صحيح حيتحاكم لكن مستحيل ينعدم
طبعاً في منظمات كتير نادت بتغيير القانون ده لكن لا حياة لمن تنادي
في حين أن لو طلع أمر سيادي بحسم القانون ده حيتعدل فورا
_ بخصوص البلطجية اللي طايحين في خلق الله ف الدولة سيباهم لغرض ما في نفس ابن يعقوب مع أنها لو حابه تلمهم حتلمهم .... عارفة هي بتلمهم أمتة ؟ لما يكون في حدث مهم زي قمة المناخ أو قمة عربية أو أو
إنما غير كده ف اغلب الشوارع دلوقتي بقي فيها بلطجية
وأغلب الشوارع دلوقتي بقي يتباع فيها المخدرات عيني عينك
_ بخصوص التصوير ف الناس هنا منقسمون عندي لنوعين
نوع معندوش دم ما بيصدق اي حاجة تحصل قصاده ف اسهل شيء عنده أنه يفتح كاميرا
ونوع تاني بيصور علشان يوثق اللي بيحصل وتكون دليل كافي علشان لو المجرم فكر يهرب ف يبقي سهل الوصول له خاصةً مش كل الأماكن بيكون متوفر فيها كاميرات مراقبة
الكلام كتير في موضوع الجريمة ده
لكن نسأل الله السلامة وأن يكتب لنا ولكم كل الخير اسفة جدا طولت عليكم
مودتي
.
.