البارحة ربـي كتـب لـي ومريـت
درب عليه بـروق الأحباب لاحـت
جيت المكـان اللـي جمعنـا وخفيـت
وقامت جروحـي للجـوارح وصاحـت
يا ليتنـي فـي لفـة الـدرب زليـت
كان العيون مـن الدمـوع استباحـت
التم غيـم الدمـع مـن يـوم لفيـت
وورقا القصيد لشوفـة الغيـم ناحـت
وضحكت ما أبغي الناس تدري يبالفيت
لكنها غصب علـى العيـن ساحـت
حارت دموعي في عيونـي وصديـت
وارمشت أبيها ما تبين… وطاحـت
وعقبه برق فالعيـن بـراق وأسقيت
خـدي ووناتـي بصـدري تـلاحـت
وأنا أحسب أني فـي فراقـه تعافيـت
وإن عبرتي من مدخل الـزاد زاحـت
اللي يحسب أني على البعـد سجيـت
وإلا أن عيونـي للرقـاد استبـاحـت
يا ليتني مـن قبـل لا أحبه أقفيت
وإلا أن دروبي عـن دروبـه تناحـت
أهون علـي مـن البكـا والتناهيـت
وآشلي من سدود على النـاس باحـت
عرفت كيف الحي يفرق عـن الميـت
وعرفت قيمـة نعمتـي يـوم راحـت
قولوا له أني عقـب بعـده تدانيـت
ورجلي عن دروب المعافيـن شاحـت
البعـد نـار وطاعـة العـذل كبريـت
يقصر على بعده… ترى الكبد فاحـت
بن فطيس المري