قادر تعذِّبني وقادر تعفـي
عارف غرامك هوّ نقطة ضعفــي

تخشّ مــــــداري
تغيِّر قراراتي وخطّ مســــاري
قادر تطفِّيني وتشعل ناري
يذوب قلب فوق صدر اللِّيالي مكفي
قادر تحدِّد وجهتي وأسفـــاري
تجرح وبكلمة حنونة تشفـــي
تحسب ليالي الشوق في انتظاري
وإن قابلتني شوق اللِّيالي تخفـي
ترصد عيونك خطوتي وأخبـاري
تجَّاهل وهو كتفك محاذي كتفـي
أنت طفل يعبث في اكتاب أشعاري
يسيب دفتره ويجي يخربش كفِّي
يضحك مع غيري يجيب سهاري
وين نبتعد يبكي ويمسك طرفـي

مرَّة تكون البلســـــــم
جرحي وعذاباتي بكلمة تحسم
ومرَّات غامض في غموض الطلسم
تضيع أبجدياتي ويعجز حرفـي
بيديك فوق صفحة أيامي ترسم
دروب شايكة فيها نلاقي حتفي
نصدَّقك ساعة تجيني تقســم
نورد ونشرب من مناهل نزفي

ضعفـي كامـــــن
في وين ما لحظة بقربك نامـن
وين ما إيديك غفن في إيدي ونامن
نقول خلاص هذا يكفي
بيَّا المشاعر في الغلا يسَّامــن
يرتاح العنا مني وجفني يغفي
فجأة علي غفله بعد نطَّامــــن
تسحب ايديك ونار شوقي تطفي
لحظات من عمر الهوى ما دامـن
عطاك الغلا سلطة تقض وترفي

تخشّ إِحْسَاســـــــــي
وتحصي عَليَّا زفرتي وأنفاســي
تغزلني مراوح مِ الشعاع الماسـي
وتطلعني علي سرّ الغرام المخفـي
توسّدني ذراع النجم وقت نعاسي
وتسرد علي سمع اللِّيالي وصفـي
ومرَّات تلبسْ ثوبْ عابث قاسـي
تجَّهم وذايب في الغلاء مـن خلفـي
وتقبس لغيري نور من نبراسـي
وبسمة شماتة في عيونك تخفــي
وقلبك وعينك في الخفاء حرَّاسي
ويسرن قوانينك وتكســر عرفـي

تغوص أعماقـــــــي ...
وتزرع أنفاسك غيم في آفاقــي
وتزهر خمائل بالحساس الراقـي
ويبحر حنينك في شواطي طرفـي
همسك عصافير وخرير سواقــي
ازدانت روابي من غلاك وعطفـي
ومرَّات تخطف مِ الغروب إشراقي
تشرق شموسك في الغياب المطفي
ومرات تذوي من جفاك أوراقي
وتذبل أثماري قبل موسمِ قطفي