السلام عليكم اخواني وخواتي ، انا بنت متزوجة وعمري 29 وعندي ولدين صغار ، انا قبل فترة تهاوشت مع زوجي بالكلام واحتد بيننا النقاش وقلت له انت موب رجال وعصب وبدأ يضربني ضرب قوي وجلدني بالعقال صار ظهري كله خطوط زرقاء ، اخذت عيالي ورحت بيت اهلي وهناك قلت لامي وابوي السالفة وجلسوا يلوموني ويقولون انتي الغلطانة عندي اثنين اخوان صغار بالجامعة يوم رجعوا البيت عرفوا بالسالفة عصبوا وراحوا يتفاهمون مع زوجي ، انا اصلاً ما قلت لهم روحوا واضربوه وكذا بس شكيت لهم وكان عبالي ان ابوي واخواني بيكلمونه ويتفاهمون معاه بس اخواني راحوا لزوجي للبيت وتضاربوا معاه المشكلة مو هنا المشكلة ان اخواني رجعوا للبيت مضروبين ومتمردغين اكثر مني ، زوجي انا لاعب حديد ونوادي واخواني نحاف حتى واحد منهم انكسر سنه اللي ورى ، انا هنا انحطيت بموقف محرج بعد ما شفت كيف زوجي غلب اخواني وصارت المشكلة كبيرة حتى ابوي وامي واقفين مع زوجي يقولون زين يسوي فيك وفي اخوانك خلوه يربيكم ، الحين هو صارله فوق الاسبوعين ما يتصل ولا يرد ولا حتى سأل عن عياله حتى ابوي كلمه واعتذر منه لكنه قال لأبوي خل بنتك عندك ، يعني هل بيطلقني او هل تشوفون ان انا الغلطانة هو اللي مد يده عشان احتد النقاش بيننا وهو اللي بدأ بالاستفزاز وفوق هذا ضربني انا واخواني ، ابي حل اصلح الوضع لأن انا ما ابي اتطلق وبنفس الوقت ابيه يعتذر على الاقل لاخواني لانه ضربهم واهانهم ، واللهرصار لي اسبوعين وانا متضايقة افكر وامي تحن علي تقول انتي روحي لبيت رجلك واعتذري له وهو ما راح يطردك اذا شافك رجعتي