الصمت يكفي ويشفي صدر راعيه
لاصار كل الحكي ما له معاني
والقلب ما عاد تعنيه المشاريه
والعين ما عاد تغريها الأماني
والخاطر العمس من يقدر يسليه
الناس ولا الشعر والا الاغاني..؟
يا كاتب الحزن في قلبي وقاريه
في نظرتي في انفعالي في حناني
ياليت حزني مجرد دمع وابكيه
ما هوب عايش معي بين المحاني
ماهوب يظهر علي واحاول أخفيه
وتصير نظرات حزني هي لساني
لو للسحايب سجن يا عبرة التيه
والله ما أحبسك بخافقي ثواني
مدري ذكرني زمان كنت ناسيه
مدري ذكرت الزمان اللي نساني
كنت أكره البحر وأخاف الغرق فيه
واليوم أحبه وأخاف من المواني
كنت أعشق الجاي بأحلامه وأمانيه
ياما بنيت بخيالي له مباني
ياما رجيت العطا من مدة يديه
حتى خذا كل شي وما عطاني