بما أن فيه تفاعل بمدونتي وماتوقعته صراحة واسعدني جدا جدا حابه احكي لكم قصتي مع سورة البقرة اللي غيرتني ميه وثمانين درجة
عشان لو فيه أحد لو سمح الله مر بنفس حالتي يستفيد

قبل عشر سنوات في مثل هذه الايام تقريبا توفيت صديقتي وزوجها في حادث مروري وقبلها بكم شهر فقدت احد اقاربي في حادث ايضا
انهرت داخليا جاتني نوبات خوف وقلق مو طبيعيه وكانت الكوابيس ماتفارقني
كم مره صحيت وانا مفجوعه احس قلبي بيطلع من مكانه
من كثر الخوف كنت انام وبابي مفتوح ابي اسمع اصوات اهلي واطمن وانا اللي كنت مااستحمل الازعاج ولا اقدر انام لو اسمع دبيب نمله
كنت خايفه على اهلي وعلى نفسي ماابي احد يطلع من البيت لو بيدي قفلت عليهم الباب
مرت علي الايام في خوف وترقب وبكاء
توقعت أن هذي النهايه خلاص
لين ربي دلني وبديت ادور على حلول في النت ولقيت منتدى للمشكلات النفسية
وبدأت اقرأ واشوف حالات شبيهه لحالتي وبديت اطمن شوي حتى فكرت اخذ أدوية نفسية لما شفت كثير منهم هناك يستخدمونها
بس المشكله هنا كيف اوصلها ماتنصرف الا بوصفة طبية
لا اهلي ولا ضروفنا وقتها تسمح بهالشي
بيوم لقيت واحد يتكلم عن تجربته مع سورة البقرة وأنه ترك الادوية وصار عايش حياته طبيعي
قلت خليني ابدأ فيها ويارب تتحسن حالتي
في البداية كانت صعبة علي ومااكملها الا بعد جهاد وتعب
بس مع الوقت وشوي شوي تعودت عليها
روحي تعودت عليها وعقلي وجسمي بعد ماكان كل شي يستنفر فيني وكأني على نار وأنا اقرأها
صار العكس صرت اقرأها براحة وسهولة ولو تركتها يوم احس فيه شي ناقصني
استمريت عليها فتره طويلة وتغيرت حياتي كل شي فيني تغير للأفضل
حسيتني ولدت من جديد حرفيا
شخصيتي صارت قوية وتعاملي مع الناس تغير للأفضل ونظرتي للحياة تغيرت
كل مااتذكر ذيك الايام اشكر ربي مليون مره
كيف انقذني برحمته من الجحيم اللي كنت عايشه فيه وغير حالي لأحسن حال بعد يأست خلاص