،.

" كيف اداوي علّة الرّوح ؟ يالبال الوسيع
ما تعرف ان خاطري كنّه الغصن النّدي

صرت احمّل عزلتي فوق ما لا تستطيع
لين شفت ان كلّ همٍ ، تهنـّى ، مرقــدي

وقلبي اللّي ساور الحبّ خطر لا يميع
منصدم من سود الايام والفال الرّدي

والشّعر تصحيح وطأة مفاهيم القطيع
ما درى اللّي يفعل الجود سمّوه اجودي

أنتمي لماضي الشّعر الأفضل والبديع
والتكيف بعض الاحيان ما هو في يدي

غير حاضره الحقيقي تركني به ضليع
ويتفجّر من جنوبي ومن باقي جسدي

وكلّ شاعر انطوائي ذكي .. ذوقه رفيع
زاهدٍ في حلمه اللّي ورا نجم الجدي

أتساءل : ليه احبّ الخلا وشوف الرّبيع
والمراد أن خلوة الذّات غاية مقصدي

كلّ شي في النّهايات متوقّع يضيع
علّمتني كيف أودّع ومن حيث ابتدي!

ليه اجامل باهت العذر والجرح الفظيع ؟
والرجاء خايب .. مع كلّ قلبٍ جرهدي

أكره الخذلان ، والفقد ، والعقل الصّديع
" كلفتّني " راحتي .. والبساط الاحمدي

اعتزلت الكلّ : لا زيد يخسّرني الجميع
ولا خسر " مبداي" والله لو أخسر ولدي " ..!

سالم بن نهاية