قنديلة الليل .. ما لجروحنا راعي
يستاحش الليل كان أَهْمَلْهْ مصباحه

اقفيت : ما اقفيت يوم اقفيت بك واعي
إلّا من طعونك اللي تجرح رماحه

حتى وانا مقفيٍ ما اختلفت اوضاعي
لا زال قلبي مضيّع فيك مفتاحه

كِفّي ظنونك : ظنونك مالها داعي
يا سيّدة شعري اللي غيّر الساحه

زَبّنته لعينك الثّنتين* بشراعي
والموج تحت اصبعي والريشه رياحه

وسخّرته يكون بين اثنيننا ساعي
يالجاذبيّة ... قبل لا تطيح تفّاحه

لولاك ما كان اقدّر قيمة اوجاعي
اللي من يديك كَنْها قيمة الراحه

يعني إذا انّك حزنتِ ليش ترتاعي
إهديه حزنك وهو يهدي لك افراحه

اقسم لك بحق ضيٍ كان خدّاعي
انك وحيدةْ شعوري واعذب جراحه

يا نجمةٍ تستبيح الليل باضلاعي
الشوق فضّاح .... والايام لمّاحه

لي كم شهر فوق الارض وكاره إقلاعي
جثمان من دون روح يلف بوشاحه

لكن اذا انّي ذكرتك طرت من قاعي
ويبكي سريري علي لو كان طرّاحه

ودّي اشوفك ولو اقطع لك ذراعي
ما ودّي ان الفراق تخيّم اشباحه

إلّا انّي اخاف فيك يكون مرجاعي
مِن كنت ليلٍ وكان الصبح مسّاحه

لكن إذا إنْكْ إنطفيتي مرّي اوجاعي
ذخرتها لك عمر : في شكل قدّاحه

وارجوك إذا مِتْ : قلبك لا يجي ناعي
ما ينفع بكاه ...... لو زمّلتي نواحه






*عـتـيـم ..!
في هزيع
هكذا نصوص يجب الا تُنسى