مشكلتك تبدأ من هنا
تبين تكونين كاملة وما تغلطين
عشان محد يقول فاشلة

أول شي أنتِ مو ملاك يعني طبيعي تغلطين
ومو لازم تصيرين ملاك
عادي عيشي مثل الإنسان الطبيعي وتخلي عن الرغبة في الوصول للكمال

ولما تفشلين كرري المحاولة لأن الفشل مو يعني النهاية
كثير فشلوا أكثر من مرة وبعدين نجحوا

اللي اخترع المصباح مثلاً فشل ألف مرة قبل ما يخترعه
لما سألوه شنو استفدت لما فشلت ألف مرة ؟
قال اكتشفت ألف طريقة لا تؤدي إلى اختراع المصباح

لو أنه استسلم للفشل من أول مرة وما كرر المحاولة
ما كان بيخترع المصباح

شفتي كيف يعني حتى الفشل يعلمنا ويصير عندنا خبرة وتجارب
وممكن نفيد غيرنا بعدين من خبرتنا

اللي يغلط كثير ويتعلم من الخطأ آخر شي يصير حكيم

وإذا ما نجحتي بشي جربي شي ثاني لين تلقين نفسك بالشي اللي تحبينه ويناسبك
وركزي على كلام الناس
أكيد في ناس يشوفونك مميزة وشاطرة بأشياء
هذول اللي لازم تقعدين معاهم بس اللي يحطمونك ابعدي عنهم

يقول ستيف هارفي كل إنسان الله خلقه ومعاه هديه
وهالهدية هي الموهبة
وهالموهبة لو عرفتيها وطورتيها ممكن تصيرين مليونيرة

وهذا الشي اللي لازم تركزين عليه أكثر شي
مو لازم تصيرين خبيرة بكل شي
أهم شي الموهبة وبس

لأن كل شخص له تخصص وله فايدة ومحد يفهم بكل شي
ولا أحد شاطر بكل شي
تخيلي لو كل الناس معلمين فقط ولا مهندسين فقط
مين بيسوي باقي الأشياء ؟

يعني أبداً لا تتفشلين إذا في أشياء ما تعرفينها
واللي يغلط لا تسكتين له ردي عليه وتعلمي طرق الرد
يعني ردي بس بذكاء وسكتيهم

يعني إذا قالوا أنتِ فاشلة قولي محد ناجح بكل شي
وانتوا بعد ما تعرفون كل شي
وعادي لو فشلت اليوم بكرة بنجح وأنا متفائلة بنفسي
ويعني مثل هالردود

أو اختصريها قولي لهم صح صح
حتى لو ما كان كلامهم صح أهم شي أنتِ تعرفين نفسك
بيسكتون لما يشوفون أن الكلمة ما أثرت فيك وعادي عندك

كل نقاط ضعفك حوليها لنقاط قوة
والأشياء اللي تخافين منها جربيها واكسري حاجز الخوف
مافي إلا هالحل
يمكن البداية بتكون صعبة وكلنا كذا بس مع التعود بيصير الوضع عادي

ولا تقارنين نفسك بغيرك
لأن يمكن أنتي قدراتك مختلفة عنهم
يعني مافي داعي للمقارنة وهذي المقارنة غير عادلة
وفيها ظلم للنفس وراح يجيك إحباط

في كتاب عنوانه
" كيف تكون غير مثالي بصورة مثالية "
أتوقع راح يفيدك

وبس
مدري شو أقول بعد بس هذ اللي جاء في بالي
> ما بقى شي أصلاً ههههه

موفقة إن شاء الله =)