انا ربيب الصمت يا اهل التّكلّام
رجّال ..... ما يقدر يبيع بضميره

يصد والصدّه على شرع الإسلام
ماهوب منّه قِل شوف وبصيره

ويغمّض عيونه على شان الايام
اللي إصْنَعَتْ للحب والشعر سيره

لو خانه احبابه بعد شوق وهيام
ياقف لهم وقفةْ قصيده خطيره

حبيبتي* .. عبّادة اشباح الاوهام
ما ينفعونك ....: ردّي الما لبيره

خَذَتْك من جهلك فلاشات الإعلام
مدري جماهير الفراغ الغفيره

لين اصبحت وِجْهَتْك عكس التّقدّام
مثل الذي يمشي على عكس سيره

كم عام مختلفه : وانا اشوف من عام
تنّورتك من فوق ساقك قصيره

هذا يلدّ العين من تحت : وإن قام
يلدّها ..... وبنصف عينٍ حقيره

ياللي تعانين التعب والتّحلطام
عضي على شفاتك تراها مثيره

عضّي ندم وإن ما نِفعك التّندّام
عضي على اوجاع السنين العسيره

لا زلت احبّك : حب قلبي للإقدام
ومحبّة الأب لضناه الصغيره

لكن : ورب الليل في حاجه انام
يوم الحكي سيفٍ ظهر من جفيره

ما ودّي آصرّح .. ولا انكّس اعلام
صديت من باب الادب والف خيره

لو تخدعون العين وتضيق الانسام
في ذمتي ما تخدعون البصيره

انا كتبت الشعر مِن كنتم اقزام
وقبل إن اصابعكم تقلّد صريره

ولا زلت فارق ماني بضمن الارقام
يا زحمة الشعّار فوق الجزيره

قصيدتي تبقى على راس الإلهام
الاولّه ..... والثانيه ... والاخيره




* عتيم ..!
















.